"Bugungi quraga ko'ra, jamoamiz Liga Kubogi chorak final bahsini o'z uyida Bekobodning "Metallurg" klubiga qarshi o'tkazadi. O'yin 14 avgust kuni bo'lib o'tishi rejalashtirilgan. Qayd etish kerakki, AGMK hozirgacha o'tkazilgan oxirgi 3ta uchrashuvdan ikkitasini aynan "Metallurg"ga qarshi o'ynadi. Dastlab Liga Kubogi guruh bosqichida to'qnash kelgan jamoalar, keyinroq chempionat doirasida ham o'zaro uchrashishgandi. Qizig'i, har ikkala bahsda ham 1:1 hisobidagi durang qayd etilgandi.
AGMK Superliganing ikkinchi davrasidagi ilk bahsni 27 iyul kuni aynan "Metallurg"ga qarshi Bekobodda boshlaydi. Shuningdek, Liga Kubogi chorak finaliga tashlangan qura mazkur jamoalarni yana uchrashtirmoqda. Demak, jamoamiz qisqa fursatda "Metallurg" bilan yana ikki bor to'qnash keladi. Bu esa mazkur eski raqiblarning joriy mavsumdagi o'zaro to'rtinchi to'qnashuviga aylanadi. Toshkent viloyati derbisi maqomidagi AGMK - "Metallurg" qarama-qarshiligida hozircha g'olib nomi aniqlanmay kelmoqda. Bo'lajak bahslarda derbi g'olibi sifatida har ikkala musobaqadagi zafarli yurishni davom ettirishga umid bog'laymiz.
Shuningdek, bugun O'zbekiston Kubogi nimchorak finaliga ham qura tashlandi. Bilasiz, AGMK mazkur musobaqaning amaldagi g'olibi sifatida turnirga nimchorak final bosqichidan qo'shilmoqda. Mazkur bosqichdagi raqib esa o'tgan yili chorak finalda to'qnash kelgan eski tanish, Muborakning "Mashal" jamoasi bo'ldi. Qura bu gal ham AGMKga "gazchilar"ni ro'baru qildi. Quraga ko'ra, mazkur bellashuv ham Olmaliqda o'tadi.
Eslatib o'tamiz, o'tgan yili chorak finalda to'qnash kelgan "Mashal"ni qo'shimcha taymlardagi kiritilgan gollar evaziga mag'lub etib yarim finalga yo'l olgandik. Bu gal ham yoqimli ananani davom ettirishga va kubok egasi sifatida sovrinni munosib himoya qilishga jamoamiz qattiq bel bog'laydi.
Taqvimga ko'ra, "Mashal"ga qarshi O'zbekiston Kubogi nimchorak final o'yinini 3/4 avgust kuni o'tkazamiz. Aniq sana ertaga PFL tomonidan elon qilinadi.
AGMKning mavsumning ikkinchi qismida o'tkazadigan dastlabki 5 uchrashuvi quyidagicha:

Superliga, 14-tur.
27 iyul.
"Metallurg" - AGMK (20:00)

Superliga, 15-tur.
31 iyul
AGMK - "Andijon"

O'zbekiston Kubogi, nimchorak final.
3/4 avgust
AGMK - "Mashal"

Superliga, 16-tur.
11 avgust
"Navbahor" - AGMK

Liga Kubogi, chorak final.
14 avgust
AGMK - "Metallurg"
Qayd etish kerakki, O'zbekiston Kubogi va Liga Kubogidagi har qanday bosqichdagi to'qnashuvlar bir uchrashuvdan iborat. Mezbon jamoa nomi esa quraga ko'ra aniqlanadi.
AGMK ayni paytda Superliga turnir jadvalida 12 ochko to'plagan holda 10-o'rinda bormoqda va sovrinli o'rinlar, yani kuchli-uchlik orasidagi farq 9 ochkoni tashkil etgan. O'zbekiston Kubogidagi yangi yo'lga jamoamiz musobaqaning amaldagi g'olibi sifatida chiqadi. Tarixda ilk bor o'tkazilayotgan Liga Kubogini esa jamoamiz muvaffaqiyatli boshlagan va guruhda mag'lubiyatsiz seriya qayd etib peshqadamga aylangandi.
#AGMK #OKMK #BizBuBiz", - deyiladi AGMK matbuot xizmati bergan xabarda.

Qura AGMKga eski raqiblarni tuhfa etdi