- Bugun biz uydagi dastlabki g'alabani qo'lga kiritdik. Bundan barchamiz xursandmiz. Biz "Dinamo"ni mavsumni juda yaxshi boshlaganini va oxirgi turlarda o'zini ko'rsata olmayotganini bilardik.

"Dinamo" biz bilan o'yinga qadar juda yaxshi himoyalanib kelayotgandi. Ular odatda 9-10 kishi bo'lib himoyalanadi. Etibor bergan bo'lsangiz, biz uchrashuv boshidan tezda hujumga o'tmasdan, o'z paytimiz kelishini kutdik. Xatto birinchi bo'limda to'p kirita olmagan bo'lsak ham shoshilmadik.

Biz to'p bilan ko'proq muomalada bo'lib, buning natijasida "Dinamo" himoyasida bo'shliq yuzaga keltirishga urindik va bunga erishdik.

Futbol shunday o'yinki, har bir raqibga jiddiy tayyorgarlik ko'rish lozim. Bugun meni xursand qilgan jihat shuki, biz bu jamoaga qarshi o'ylangan rejamizni maydonda to'liq amalga oshirdik. Natijada esa g'alabaga erishdik. Albatta uchta gol urganimizdan keyin yigitlar xotirjamlikka berilishdi va buning natijasida gol o'tkazib yubordik.

Bugun jamoamiz himoyachisi Anvar G'ofurov qizchalik bo'lgandi. Biz unga qo'shaloq bayram, yani g'alabani taqdim etdik. Kecha G'ofurov tug'ilgan kunini nishonladi, rafiqasi unga qiz farzandni, jamoamiz esa g'alabani taqdim etdi. Bu albatta yoqimli.

Rauf Inileev: "Uydagi dastlabki g'alabadan barchamiz xursandmiz"