Ushbu uchrashuv yakunlangach jamoa azolariga rasman chempionlik kubogi topshirildi. Taqdirlash marosimida ko'plab martabali mehmonlar, mutasaddi rahbarlar ishtirok etishdi. Ular qatoridan o'rin olgan O'FA birinchi vice-prezidenti Ravshan Ermatov fikrlari bilan o'rtoqlashdi.

"Avvalo "Paxtakor" muxlislarini navbatdagi chempionlik bilan tabriklaymiz. Jamoa murabbiylari, futbolchilari bu yo'lda katta mehnat qilishdi. Albatta buni ham etirof etishimiz kerak. Mavsumning yakuni bo'lgani bois ayrim futbolchilarda charchoq alomati borligi ko'rinib turibdi. Shunday bo'lsada, milliy terma jamoamiz bosh murabbiyi Srechko Katanec 3ta yosh futbolchini o'zining yon daftariga yozib oldi. Quvontiradigan jihati shuki, bizda yangi yosh futbolchilar etishib chiqmoqda. Ular ertangi kunda terma jamoamizning asosi bo'la oladi",- deydi Ravshan Ermatov.

- Sir bo'lmasa, 3 nafar futbolchining ismini ayta olasizmi?

- Men bu jarayonga aralashmayman. Chunki bu noto'g'ri bo'ladi. Terma jamoa murabbiyi xursand bo'lib 3 nafar futbolchining o'yinini kuzatib borishini aytdi. Bundan men ham xursandman. Mana shunday o'yinlar orqali yoshlar shakllanadi, o'sadi. O'zlarining orzusi bo'lgan terma jamoada o'ynash uchun astoydil harakat qilishadi.

Ravshan Ermatov: "Srechko Katanec "Paxtakor" - "Surxon" o'yinidan 3 nafar yosh futbolchini yon daftariga yozib oldi"