- O'yin muhim edi. Guruhdan chiqishni istadik. Minimum vazifa bajarilganidan xursandman. Bahs bizning nazoratimiz ostida o'tdi. Menimcha, chiroyli va tartibli o'yin bo'ldi. Indoneziya termasi yaxshi himoyalandi. Shunday bo'lsa-da, ularning himoyasini yorib o'tishga harakat qildik. Yaxshi vaziyatlar ham yaratdik, ammo bularni golga aylantira olmadik.

- Bahs oldidan bir qancha futbolchilarga dam berdingiz. O'yinga futbolchilarni durang uchun maydonga tushirdingizmi?

- Yo'q, rotaciya qildik. Bu o'yin uchun mantiqan olib qaraganda zaxirada o'tirib qolgan futbolchilarga ham imkon berishimiz mumkin edi. Jarohatlar, charchoqdan qo'rqdik. Barchani almashtirib tashlab, yigitlarni tonusdan chiqarib qo'ymoqchi emasman. Ikki o'yinda ko'p kuch yo'qotgan futbolchilar biroz dam olib, kuch yig'ishi kerak edi. Bugun maydonda harakat qilgan futbolchilar ham yomon o'yin ko'rsatgani yo'q.

- Pley-offdagi raqib Avstraliya. Ushbu bahsda nimalar muhim?

- Ilk navbatda yigitlarning tiklanish jarayoniga ahamiyat beramiz. Pley-off o'yinlari barchasini hal qiladi, bitta xato kechirilmasligi mumkin. Yigitlarni yaxshi holatga olib kelib, ruxlantirish, menimcha, unchalik muammo bo'lmasa kerak. Jahon chempionatiga yo'llanma, biz, Siz, barcha uchun kerak. Bu bahsga har taraflama yaxshi tayyorlanib, yutib olishimiz kerak.

- Umarali Rahmonaliev uzoq masofadan zarba yo'llamayapti. Bu Sizning qaroringizmi? Chunki futbolchilar uzoqdan deyarli zarba berishmayapti.

- Deyarli barcha o'yinlarda uzoqdan zarba berishga harakat qilib ko'rishdi. Indoneziya termasi uzoqdan zarba beriladigan nuqtalarni yaxshi berkitdi. Zarbalarsiz gol bo'lmaydi. Kimgadir kamroq tep, kimgadir ko'proq demaymiz. Ha, bazida yigitlar ichkariga kirib borishni istashdi. Balki shoshqaloqlik, balki, sovuqqonlikdir... O'rtasida. Bir tomonga ko'proq yonbosish kerak.

- O'zbekiston birinchi bo'limda besh himoyachi bilan o'ynadi. Bu gol urishimizga qiyinchilik tug'dirmadimi? Avstraliya haqida nima deysiz?

- Besh himoyachi ko'proq 3-4-3 taktikasiga o'xshaydi. Ikki qanot himoyachilari hujumga ko'proq chiqib turadi. Himoyachilarga shunday vazifa berilgandi. Indoneziyada bosh murabbiy imzosi ko'rinib turibdi. Raqiblar tartibli o'ynashdi. Bizda Abbos va Umarali qanot hujumiga yordam berishi kutilgandi. Maqsadimizga deyarli erishdik. Hujumda vaqt o'tkazdik, himoyaga ish bo'lgani ham yo'q. Albatta, raqiblar zich o'ynagani uchun paslarni o'tkazib bera olmadik. Bunday paytda muammolar yuzaga chiqib keladi.

Avstraliyani kuzatib boryapmiz. Ular o'yindan-o'yinga kuchayib borishmoqda. Ularni yana taxlil qilamiz. Murabbiylar shtabimizdagi taxlilchilar o'yinlarni kuzatib borishmoqda. O'yinga munosib taktika va rejani tayyorlaymiz.

Ravshan Haydarov: "Avstraliya o'yindan-o'yinga kuchaymoqda"