As нашри Мадрид клубининг молиявий ҳисоботига таяниб хабар беришича, 2024 йил июлидан декабригача "Реал"нинг умумий даромадлари 589,8 миллион еврони ташкил этди – бу ўтган мавсумнинг шу даврига нисбатан 27,9% кўпдир.

"Реал"нинг "Сантьяго Бернабеу" стадионидан ўйин бўлмаган кунларда олинган даромади мавсум бошидан буён 43,9 миллион еврони ташкил қилди – бу сумма 2023/24 йилги мавсумдаги шу йўналишдаги умумий даромаднинг 95% ни ташкил этади. Ўйин кунларидаги даромад эса 149,6 миллион еврога етди – ўтган мавсумнинг шу даврида "Реал" 94,5 миллион евро ишлаб топган эди. Шу билан бирга, "Реал"нинг барча турнирлардаги 20 та уй ўйинидан 19 тасида 70 мингдан ортиқ томошабин иштирок этди.

Мавсум бошидан бери "Реал"нинг маркетингдан олинган даромадлари ўтган мавсумга нисбатан 38,6% га ўсиб, 250,4 миллион еврога етди. Шунингдек, клубнинг чакана савдо, ҳомийлик ва лицензиялашдан олинган даромадлари ҳам ошди.

Таъкидланишича, "Реал" 2024/25 мавсумини рекорд даромад билан якунлаши эҳтимолдан холи эмас. Эслатиб ўтамиз, 2023/24 мавсум якунларига кўра Мадрид клуби дунёда биринчи бўлиб 1 миллиард евродан ортиқ даромад қайд этган эди.

"Реал" мавсумнинг биринчи 6 ойида 589,6 миллион евро ишлаб топди. 20 та уй ўйинидан 19 тасида томошабинлар сони 70 000 дан ошди