"Реал Мадрид"

ЕЧЛда ярим финалда куршани давом эттираётган "Реал" Ла Лиганинг 33 ўйинидан кейин 24 та ғалаба ва 6 дуранг қайд этди. 78 очко ва етакчиликдан ташқари жамоа ҳужумда ҳам энг сермаҳсул ўйин кўрсатмоқда - 69 та гол. Охирги икки турда "қаймоқранглилар" "Севилья"ни (3:2) ва "Осасуна"ни (3:1) мағлуб этишди.

Бугун Начо ва Милитао дисквалификация, Алаба эса жароҳат сабаб жамоага ёрдам беролмаслиги аниқ бўлса, яна бир қатор футболчилар, ҳаттоки қайдномага кирганлар ҳам мураббийнинг қарорига кўра дам олиши кутилмоқда. Ахир олдинда "Ман Сити"га қарши жавоб баҳси кутиб турибди.

"Эспаньол"

Бу мавсум "Эспаньол" аввалгисига қараганда яхшироқ ҳаракат қилмоқда, аммо жамоа кўплаб жиҳатларда ҳали жиддий иш олиб бориши зарурлиги турган гап. Тажрибали футболчилар етишмовчилиги ўз сўзини айтмоқда. Испания Кубогида "Понферрадина" ва "Паленсия"ни енгиб ўтган барселоналиклар 1/8 финалда "Мальорка"га имкониятни бой берди.

Испания чемпионатида 33-турдан кейин Висенте Морено жамоаси 10 ғалаба ва 9 дуранг билан 39 очко жамғариб, 13-поғонани банд этиб турибди. 10 апрель куни "Сельта" устидан қозонилган ғалабадан кейин (1:0) меҳмонлар иккита ўйинда мағлуб бўлишган.

Бугун жамоага жароҳат сабаб Оскар Гил ва Кейди Баре ёрдам бера олмайди.

Бу баҳсда мезбонлар қандай таркибда майдонга тушган тақдирда ҳам фаворит бўлиб қолаверади. Албатта, ким ҳам чемпионликни ўз стадионида нишонлашни хоҳламайди? Қўшимчасига, "Сити"га қарши оғир ва муҳим учрашув олдидан бу ғалаба позитив кайфиятга сабаб бўлади. Барселоналиклар эса сўнгги турларда анча ҳорғин кўринишмоқда.

"Реал"га чемпионлик келтириши мумкин бўлган ўйин превьюси