Португалиялик футболчи "Қироллик клуби" учун 30 млн еврога тушган. Бу ўз вақтида ҳимоячилар орасидаги энг йирик трансферлардан бири ҳисобланарди. Бироқ, Фабио "қаймоқранглилар"нинг умидларини оқлай билмади. Оғир характери, машғулотларга кечикиши ва нопрофессионаллиги аста-секин унинг даражасини туширди. "Реал Мадрид"дек клубларда ўз устида ишламай қўйганларнинг келажаги йўқ. Коэнторау билан ҳам шундай бўлди. Дастлаб, "Монако" ва "Спортинг"да ижара асосида ўйнаган футболчи 2018 йилга келиб ҳеч кимга керак бўлмай қолди.

Фабио узоқ изланишлардан кейин ўзи учун бегона бўлмаган Португалиянинг "Риу Аве" жамоаси таркибига бориб қўшилди. У профессионал футболдаги илк қадамларини айнан шу клубда қўйган эди. Бироқ, Коэнтрау мавсум охирида Вилла-ду-Конди жамоасига ҳам керак бўлмай қолди. Сабаби шундаки, ҳимоячи 21 ўйинда 7 та сариқ карточкадан ташқари, 2 бор майдондан ҳам четлатилди. Жамоа раҳбарияти Фабио билан шартномани узайтиришни истамади. 2019 йилнинг ёзида эркин агентга айланган футболчи 1 йилдан ошиқ муддат ўзига янги жамоа тополмади. Уни 2020 йилнинг кузидагина пандемия туфайли қийин кунларни бошдан ўтказаётган жонажон "Риу Аве"си яна катта футболга қайтарди.

Хуллас, бир пайтлар дунёнинг энг яхши чап қанот ҳимоячиси бўлиши кутилган ва жаҳоннинг энг кучли клубига трансфер қилинган Коэнтрау 33 ёшга тўлди. У айни пайтда Португалия чемпионатининг аутсайдерида ҳам асосий футболчи эмас.

"Реал"да 8 йил ўйнаган Коэнтрау ҳозир қаерда?