Shu maqsadda bugun Superliga klublariga ushbu yangilik yuzasidan fikrlarini bildirish uchun maktub jo'natilgan. Gap oltin ochko qoidasini bekor qilish haqida ketmoqda. Mavsum avvalida PFL rahbariyati matbuotda chiqish qilib, bu yilgi chempionat yangicha formatda o'tishini aytan edi.

Yangilik amalga oshdi, oliy liga nomi Superligaga o'zgartirildi. Klublar soni qisqartirilib, 12taga etkazildi. Yangi chempionatimizning birinchi bosqichi yakuniga ham yaqinlashib qolgandi.

Lekin mavsum o'rtasiga kelgan bir paytda Reglamentga yana o'zgartirish kiritishga to'g'ri kelib qoldi. Bu narsa kimga yoki nima uchun kerak bo'ldi, degan haqli savol tug'iladi. Tez orada bu savolga javob ham olarmiz.

Balki, ayrim klublar bunga rozi bo'lishmas. Har qanday holatda ham Superligada ishtirok etayotgan jamoalarga murojaat tariqasida maktub jo'natilgan. Noma esa rasmiy maqomga ega. Yani, PFL bosh direktori Omon G'ofurovning imzosi qo'yilgan.

Ko'ramiz, klublar bu so'rovga qanday javob berishar ekan va PFLning yakuniy qarori qanday bo'larkan? Bunga bir necha soat vaqt qoldi. Ammo, hozirdanoq ijtimoiy tarmoqlarda bu yangilik yaxshigina muhokamaga sabab bo'lib ulgurdi. PFL manziliga tesha tegmagan gaplar aytilmoqda. Xullas, kutamiz! Ungacha esa maktub bilan tanishib turing!

Reglament o'zgarishi mumkin, PFL klublarga xat jo'natdi