Portugaliyalik futbolchi 22 yanvar kuni riyodliklar safidagi debyut o'yinini o'tkazdi. Umuman olganda o'rta darajadagi ishtirok, gol ham assist ham yo'q. O'yinda etiborimni tortgan jihat, riyodlik futbolchilarning maksimum Ronalduga o'ynashgani bo'ldi. Albatta voqelikning bunday davom etishi oldindan kutilgandi. Futbolchilarning super yulduzni to'p bilan taminlashga intilishi, o'zaro kombinaciya qilishga urinishlari tabiiy hol. Ayrim vaziyatlarda ushbu aspektning jamoa zarariga ishlagani ham bor gap. O'yindan keyin riyodliklar ustozi Rudi Garciya ham ushbu jihatga alohida to'xtalib o'tdi.

"Futbolchilarning odatdagidek o'ynashi va har doim Ronalduni to'p bilan taminlashga harakat qilmay o'ynashi juda muhim. Men ularga maydonda to'g'ri tanlov qilishlari kerakligini aytdim. Ochig'i, Krishtianu va Taliska bo'sh bo'lsa va to'p so'rasa, biz ularga to'pni berishimiz kerak. Bu ikki futbolchi vaziyatni o'zgartirib yuborishga qodir”, – degan murabbiy.

Xolis fikr bildiradigan bo'lsak, riyodlik futbolchilarning Ronaldu tomon tinimsiz uzatmalar yo'llashlari, yakunda ko'plab braklarni keltirib chiqarishi mumkin (Ittifoqqa qarshi o'yin bunga misol). O'yinda ko'rdikki, Krishtianu to'pga etishi qiyin bo'lgan va murakkab vaziyatlarda tursa ham uzatmalar berilaverildi. Rudi Garciya bu masalada jiddiy bosh qotirishi lozim. Futbolchilarida kerak bo'lmagan vaziyatlarda, Krishtianuga to'p uzatmaslikga immunitet paydo qilishi kerak. Aks holda, o'yin sifati pastlaydi bu esa Ronaldu uchun ham klub uchun ham yaxshi emas. Ehtimol, bu ilk o'yindagi oniy holat bo'lishi mumkin. Bugun tunda riyodliklar superkubok doirasida “Al Ittihod” bilan bahs olib borishadi.

Ko'ramiz va kuzatamiz, o'yin Toshkent vaqti bilan 23:00 da start oladi.

Jaloliddin Xalilov.

Ronalduga to'p uzatmang