Кескин курашлар остида ўтган баҳсдан сўнг қаршиликлар бош мураббийи Рўзиқул Бердиев фикрларини билдриб ўтди.

“Бугунги рақбимиз жиддий ва кучли эди. Улар бугун ўз майдонида ҳаракат қилди. Табиийки, биринчи рақам остида ўйнашини кутгандик. Охирги ўйинларни кўрганимизда асосан узун паслар ва стандарт вазиятларда хавфли кўриниш олишди. Биз буни билган ҳолда майдонга чиқдик. Уларнинг кучли томонларини сезган ҳолда диққат ва эътиборни йўқотишмади. Қарши ҳужумларда яхшироқ ҳаракат лозимлигини тушунтиргандик. Кўплаб вазиятлар содир этганимизга қарамасдан иккитасини голга айлантирдик. Муҳими рақиб майдонида ғалаба қозондик.

Ҳакамлар бугун жуда яхши ишлашди, хатолар кам кузатилди. Биз доим йигитларни тоза ва ҳалол ўйинга тайёрлаймиз. Бизга бекорга ҳар йили фэйр-плей совринини беришмайди. Футболда айёрликлар бўлиб туради. Аммо, ғалаба учун барча нарсани қилиш керак. Мен ўйлайманки шогирдларим ётиб олиб ўйинни чўзгани йўқ. Улар уч очкога муносиб ҳаракат қилишди.

Умар Эшмуродов жамоамизга қайтишни истади. “Пахтакор” раҳбарияти бизга таклиф билан чиқишди. У бизга кераклиги учун сафимизга қўшиб олдик. Абдувоҳид Неъматов жароҳатдан сўнг тикланмоқда. Умумий гуруҳ билан шуғулланмоқда. Кейинги ўйинларда унга ҳам имконият берамиз. Машҳур Муҳаммаджонов қишки йиғинларимиздаги ўртоқлик ўйинларида асосий дарвозабонимиз бўлди”, деди Бердиев.

Асқар Эшмўминов ёзиб олди

Рўзиқул Бердиев: "Бекорга бизга ҳар йили фэйр-плей совринини беришмайди..."