- O'yin haqida

- Bahs qiyin kechishini bilardik. Chunki bundan oldin qiyin o'yin o'tkazgandik, toliqish bor edi. Natija uchun harakat qilishimiz lozim edi, ammo o'yindagi qizil kartochkadan keyin hammasi tubdan o'zgarib ketdi. Bu mag'lubiyatimizga asosiy sabablardan biri bo'ldi. Ehtiyotkorroq o'ynashimiz kerak edi, lekin buni amalda bajara olmadik va mag'lubiyatga uchradik. Juda alamli mag'lubiyat bo'ldi, chunki sovrinli o'rinlardan birini egallashni istagandik. Biroq bu – futbol. O'shanga mag'lubiyatni to'g'ri qabul qilamiz.

- Jo'rabek Mannonovning maydon markazidagi harakati katta tavakkal edi. Murabbiy sifatida bu "Nasaf" uchun qimmatga tushdi deb hisoblaysizmi?

- Ha, albatta. O'yin oldidan yigitlarga o'yinda VAR tizimi ishlashini takidlagandik. Qizil kartochka, ofsayd va penalti bilan bog'liq holatlarda ehtiyorkor o'ynashlarini uqtirgandik. Kutilmaganda Mannonov qo'pollik ishlatib, jamoani qiyin ahvolda qoldirdi. Biz ko'proq himoyaga etibor qaratib, yuqori bo'lmagan tempda o'ynashni rejalashtirgandik.

- Kubok o'yinida Marko Stanoevichning o'rnini qaysi futbolchi bilan to'ldirishni rejalashtiryapsiz?

- Bizda katta zaxira yo'q. Asosan, bitta tarkib bilan harakat qilyapmiz. Shu bois ichki zaxiramizdan maksimal foydalanamiz.

- "Nasaf" o'rinbosarlari uchinchi o'rinni olishdi. Umuman olganda, kelasi mavsumda yoshlar tarkibidan kimlar asosiy jamoaga jalb qilinadi?

- Albatta, asosiy tarkibga jalb qilinadigan futbolchilar bor. Bunga etibor qaratamiz.

- "Nasaf"ning O'zbekiston kubogini olish imkoniyatini qanday baholaysiz?

- Chempionlar ligasida o'ynash uchun bizda faqat bitta yo'l qoldi – O'zbekiston kubogi finalida g'alaba qozonish.

- "Nasaf"ning mavsumdagi umumiy muammosi?

- Oldinroq aytganimdek, muammolardan biri – tarkibimiz, zaxira o'rindig'imiz u qadar keng emasligi. Shu tufayli bitta tarkib bilan o'ynab kelyapmiz. Bugungi o'yinda charchoq alomati "Lokomotiv"ga qo'l kelishini bilardik, chunki ular to'pni yaxshi nazorat qiladi. Jamoamizning 90 daqiqaga kuchi etmasligini "temiryo'lchilar" yaxshi bilib turishgandi.

- Mavsum yakuniga etmoqda. Futbolchilarga takliflar ham kelib tushadi. "Nasaf" tarkibi negizi saqlab qolinadimi?

- Ko'pchilik futbolchilar shartnomalarini uzaytirishdi. Menimcha, jamoa negizi saqlab qolinadi. Shuningdek, yaxshi o'yinchilarni tarkibga jalb etishimiz kerak bo'ladi.

Ro'ziqul Berdiev: "Chempionlar ligasida o'ynash uchun bizda faqat bitta yo'l qoldi – O'zbekiston kubogi finalida g'alaba qozonish"