"Барча мухлисларимизни бугунги ғалаба билан табриклайман. Ўйлашимча ўйин тўлиғича устунлигимиз остида ўтди. Болларда ҳаяжон сезилиб турди. Қисқа қилиб айтганда бугун ҳақли ғалабага эришдик", - дейди Рўзиқул Бердиев.

- Кўпроқ гол уриш керак эди...
- Асосийси натижа. Биз йирик ғалабага эришдик ва кейинги босқичга чиқдик.

- Бугунги ўйинда асосийси натижа. Гуруҳ босқичига яна бир қадам ташладик. Ўйин давомида рақибнинг кучсиз томонларидан фойдаландик, - дейди ўйиннинг энг яхши футболчиси Драган Черан.

- "Ал Ҳидд" бугун жуда кучсиз ўйнади. Сизга қандай туюлди?
- Бунга бизнинг тезкор иккита гол урганимиз сабаб бўлди. Рақиб гол ўтказгач ҳужумга ўтишга уринди. Биз эса ишончли ўйнаб ғалабага эришдик.

- Чап қанотда майдонга тушган Ислом Кенжабоев кўпчилик учун янгилик бўлди. Мавсум давомида чап қанотда айнан Ислом ўйнайдими?
- Бугун унинг асосий таркибда тушишига асосий сабаб Туркиядаги йиғинда чап қанотда энг фаоллардан бири бўлди. Агар ўз устида ишлашда давом этса яхши футболчи бўлиб етишади.

- Кейинги баҳс "Ал Фатеҳ"га қарши ўйнайсизлар. Бу клуб "Ал Ҳидд"дан анча кучли...
- Тўғри айтдингиз. Саудия Арабистони ва Баҳрайн футболи анча фарқ қилади. Бу жамоа айни пайтда ўз лигасида энг сўнгги поғонада бормоқда. Бу ҳеч нарсани англатмайди. Бу жамоа ўйинларини кўрдим. Эртадан "Фатеҳ"ни ўргана бошлаймиз.

- Бугун Черан ҳужумчи ортида ўйнади. Фақат бугунги ўйин учун танланган тактикамиди?
- Албатта, фақат бугунги ўйинда Черан ўйнади. Эркинов боши билан яхши ўйнайди, шу боис ҳужумга қўйдик. Черан эса пасни ҳам яхши беради. Шу боис тактикамиз шундай бўлди.

- Сизга бу жойда ўйнаш қийин бўлмадими?
Драган Черан: - Йўқ у қадар қийин бўлмади. Жамоага фойда келтирсам бўлгани.

- Акмал Шораҳмедов жамоага жуда тез чиқишиб кетди. Бунга сабаб нима?
- Акмал ҳақиқий профессионал эканини исботлади. Бунга шубҳа йўқ эди. Бизнинг жамоага келган ҳар қандай футболчи тезда киришиб кетади.

- Кейинги режалар қандай?
- Бир ҳафтадан кейин "Ал Фатеҳ" билан ўйнаймиз. Агар ғалаба қозонсак гуруҳ босқичига чиқамиз. Февраль ойида бизда йиғин ўтказиш қийин, шу боис балки хорижий йиғин ўтказишимиз мумкин.

Нарзулла Сайдуллаев

Рўзиқул Бердиев: "Эртадан "Ал Фатеҳ"ни ўрганишни бошлаймиз"