- Yangi mavsumning ilk o'yini derbiga to'g'ri keldi. Bu galgi start har qachongidan ham qiziqroq bo'ladi deb o'ylayman. "Sho'rtan" jamoasi bilan so'nggi yillardagi to'qnashuvlarimiz juda qiyin kechib kelmoqda. Bu qarama-qarshilik haqiqiy derbilarga xos tarzda o'tadi. O'tgan yili ham bu jamoa bilan har ikkala bahs dramatik tarzda kechgandi. Bu safar ham oson bo'lmasligi aniq. Ushbu yildan "Sho'rtan" jamoasida yangi murabbiy ish boshladi. Zoir To'raqulov murabbiy sifatida o'z qarashlariga ega deb bilaman. "Sho'rtan" yangicha uslubda futbol o'ynashi mumkin. Tarkibda ham tajribali futbolchilar etarli. Shu boisdan, bu bahs muxlislar uchun qiziqarli o'yin bo'ladi. Tarkibda bazi o'zgarishlarga qo'l urishim mumkin. Safimizga jalb etgan yosh istedodli futbolchilarga, yangi kelib qo'shilgan o'yinchilarga imkoniyat beramiz. Shu jihatdan olib qaraganda, bu bahsda o'yin amaliyotiga ega bo'lishlari uchun boshqa futbolchilarga ham imkoniyat taqdim etamiz. Ularni tarkibimizga qo'shib oldikmi, demak ularga ham imkon berishim lozim. Bo'lmasa bu futbolchilar o'sishdan to'xtab qolishlari mumkin. Umid qilamanki, dastlabki uchrashuvda muxlislarimizni xursand etamiz.

Ro'ziqul Berdiev: "Sho'rtan"ga qarshi bahsda muxlislarga yoqadigan o'yin bo'ladi"