Баъзилар "куракда турмайдиган" фикрлари орқали кун мавзусига айланган бўлса, кимлардир майдонда тартибсизлик чиқишига сабабчи бўлди. Табиийки, ЎзПФЛ можароли вазиятларнинг барчасини тегишли қўмиталарга оширганди. Лекин якуний қарорлар ҳанузгача эълон қилинмади.

"Championat.asia" таҳририяти бу масалага ойдинлик киритишга уриниб кўрди. Бизга маълум бўлишича, Coca-Cola Суперлига 23-туридан ўрин олган “Андижон” – “Насаф” (1:1) учрашуви давомида Регламентга зид бўлган қатор ҳатти-ҳаракатлари билан ажралиб турган Рўзиқул Бердиев 2 ўйинга дисквалификация қилинди.

Ўзбекистон кубогининг чорак финал босқичида Жиззахда ўтказилган ўйин якунида оммавий жанжал содир бўлганини биласиз. Мазкур баҳсдаги ноўрин ҳаракатлари учун 3 кишига нисбатан дисквалификация чораси қўлланилган.

Тартиб-интизом қўмитаси Улуғбек Бақоев, Баҳодир Насимов ("Сўғдиёна") ва Умарбек Эшмуродовни ("Насаф") 2 тадан учрашувга четлаштирилган.

Шунингдек, юқорида номи келтирилганларнинг барчаси жаримага тортилгани айтилмоқда. Ҳозирча бу ҳақда аниқ маълумот топа олмадик.

Бундан ташқари, Питер Хюстра ва Жасур Ҳасановга Этика қўмитаси томонидан огоҳлантириш берилган. Эслатиб ўтамиз, "Пахтакор" устози Суперлига 23-тур ўйинидан кейин Жиззахдаги майдон ҳақида ўз фикрларини билдирган. "Сўғдиёна" етакчиси эса унга қўпол тарзда жавоб қайтариб, шахснинг шаъни ва қадр-қимматини камситувчи ўхшатишдан фойдаланган эди. Аввалроқ Микаэл Секейранинг жаримага тортилгани айтилганди.

Мақола: "Кино давом этади": "Насаф" Диаките учун жарима тўлайди

Рўзиқул Бердиевга қандай жазо берилди? Баҳодир Насимовгачи?