Унда “НБУ-Осиё” ҳамшаҳари “Обод”ни қабул қилиб, иродали ғалабага эришди. Якуний ҳисоб “банкирлар” фойдасига ҳал бўлганидан сўнг (5:2) мезбонлар устозини фикрлари билан қизиқдик.

- Учрашувнинг дастлабки 30 дақиқасидан қониқиш хосил қилмадим. Йигитлар бу вақт давомида берилган вазифани бажара олмади. Аммо қолган дақиқаларда улар аста-секин ўзларини кўрсата бошлади. Айниқса иккинчи бўлимда ўйинимиз кутилганидек чиқди ва шу тариқа керакли натижани қўлга киритдик – дея гап бошлади Руфат Акрамхўжаев.

- Биринчи бўлимда ўз дарвозамиздан иккита гол ўтказиб юбордик ва бўлим якунланишига келганида, Леонид Кошелев ҳисобни қисқартира олди. Мазкур гол жуда керак эди. Айнан ҳисобни 1:2 кўринишга келтирганимиздан сўнг йигитларда руҳий жиҳатдан ўсиш бўлди ва бу уларга қандайдир умид учқунларини уйғотди.

- “Обод” яхши жамоа. Буни олдин ҳам айтганман. Уларда жамоавий ўйин яхши йўлга қўйилган ва бундан ташқари аҳиллик бор. Гарчи ҳисоб 4:2 ёки 5:2 бўлаётганида ҳам рақиб футболчилари дадил олдинга ташлангани эътиборга моликдир.

- Албатта дербида муваффақият қозонганимиздан мамнунман. Йигитлар ўзларида куч топа олди ва иродали ғалабани қўлга киритдик. Бунинг учун шогирдларимга миннатдорчилик билдирган бўлардим – дейди “НБУ-Осиё” бош мураббийи.

Исломбек Рустамбеков суҳбатлашди.

Руфат Акрамхўжаев: “Мағлубиятга учраётган пайтимизда ҳам йигитлар руҳан “синиб” қолмади”