- Албатта "Қизилқум"га ғалаба учун келгандик. Афсуски футболда кўп нарса бизга боғлиқ эмаслигини бугун гувоҳи бўлдик.

- Биринчи навбатда бугунги ўйин учун йигитларга раҳмат айтаман. Учрашувнинг 75 дақиқасини 10 киши бўлиб ўтказиш осон эмас. Боз устига меҳмонда ўйнадик. Лекин шунга қарамай футболчиларим охиригача курашди ва мухлисларимизни хурсанд қилиш учун ижобий натижа қайд этишга харакат қилди.

- Ўйинда биринчи бўлиб ҳисобни очдик. Кўрдингиз танаффусга ҳисобдаги устунликни ўзимизда сақлаб қолдик. Афсуски иккинчи таймда бизга янада оғир бўлди. Жуда ҳам оғир. Бу ерда мен рақибнинг ўйини кучайганини назарда тутмаяпман. Бунинг бошқа сабаби бор. Ҳозир фикрларимни матбуотда юзага чиқаришни истамайман.

- Бугун мағлубиятга лойиқ эмасдик. Шогирдларим билан фахрланаман. Уларга ишонаман. Ўйин пайтида ва учрашув якунига етганидан кейин ҳам навоийлик мухлислар бизни қарсаклар билан олқишлади. Бунинг учун уларга раҳмат.

- Бизда учрашув видео тасмаси бор. Уни яна обдон кўриб чиқамиз ва хатоларимиз устида ишлаймиз. Нафақат рақибнинг ўйинидан келиб чиқиб, балки бошқа жиҳатлар бўйича ҳам ишлашимиз кераклиги кўриниб қолди.

- Ҳакамлар? Ўйинни ҳамма кўрди. Ҳамма ўзига яраша хулоса чиқариб олади. Учрашувга ПФЛ ҳакамлар департаменти бўлими бошлиғи ҳам ташриф буюрган ва у киши ҳам ҳакамларнинг харакатларини кузатиб борган бўлса ажаб эмас. Рефериларга айнан улар баҳо беришсин - дейди Рустам Раҳмонович.

Рустам Абдуллаев: "Мағлубиятга лойиқ эмасдик"