Ushbu uchrashuvdan so'ng terma jamoamiz posboni Rustam Umarov bilan o'yin haqida ijtimoiy tarmoq orqali suhbatlashdik.

“Kolumbiya terma jamoasi bilan juda ham zo'r o'yin bo'ldi. Uchrashuvdan oldin jamoadoshlarim bilan yig'ilib faqat g'alaba qozonishimiz haqida gaplashgan edik. Maydonga chiqib kelayotganimizda tomoshabinlar juda ham ko'p edi. Biz ularga etibor qaratmasdan o'z o'yinimizni ko'rsatishga harakat qildik. O'zimizni xuddi o'z uyimizda o'ynayotgandek tasavvur qildik.

Muxlislar ularni emas bizni qo'llab-quvvatlab turgandek tuyuldi. Xuddi Toshkentda bo'lib o'tgan Osiyo chempionatiga o'xshab ketdi. Raqib darvozasiga ikkita gol urib olganimiz bizga yordam berdi. O'zimizga bo'lgan ishonch yanada ortdi. Birinchi bo'limda raqib jamoada ham bizda ham golga tortadigan vaziyatlar ko'p bo'ldi. Ular mag'lubiyatga uchrayotganini bilib o'ynovchi darvozabonni maydonga tushirishdi. O'sha vaziyatda biz bo'sh qolgan darvozani ishg'ol qilsak bo'lardi. Lekin ushbu vaziyatdan foydalana ololmadik. Ikkita xatoyimiz tufayli raqib jamoa futzalchilari darvozamizni ishg'ol qilishdi. Juda ham alamli durang natija. Bundan fojea yasamasligimiz kerak, chunki oldimizda yana bitta o'yin bor. Nasib qilsa guruhdan chiqamiz”, - deydi futzal bo'yicha O'zbekiston milliy terma jamoasi posboni Rustam Umarov.

Jahongir Sotvoldiev suhbatlashdi.

Rustam Umarov: “Juda ham alamli natija”