Guruh o'yinlari ham yakuniga etay deb qoldi. Saytimiz xodimlari bilan kelishgan holda JCHga bag'ishlangan anketa tashkil qildik. Unda jurnalistlarga beshta savol beriladi va shu savollardan kelib chiqib har kim o'z javobini aytadi. Demak, anketamizning dastlabki ishtirokchisi Xayrulla Xoliqov. Quyida savollar va X.Xoliqovning javoblarini o'qishingiz mumkin.

Savollar
1. Jahon chempionati borasidagi taassurotlar?
2. Qaysi o'yinlar ko'proq yoqdi?
3. Osiyo jamoalarining ishtiroki haqida nima deya olasiz?
4. O'zingiz uchun kimlarni kashf qildingiz? (Jamoa va futbolchilardan)
5. Jahon chempioni bo'lish uchun kimda imkoniyat yuqori?

Javoblar
1. Jahon chempionatidek har to'rt yillikning eng yirik musobaqasini doimgidek katta qiziqish bilan ko'rib boryapman. O'yinlar men kutgandan ham shiddatli kechmoqda deya olaman. Shunda bazan o'ylanib qolar ekansan, agar terma jamoamiz chiqqanida shunday tezlikka bardosh bera olarmidi deb. Bu yilgi mundialda istalgan voqea yuz beradimi? To'g'risi, bu borada bir narsa deyish qiyin. To'g'ri, guruh o'yinlarida kutilmagan natijalar kuzatildi. Ammo pley-off boshlangach, favoritlar o'z so'zini aytsa kerak. TV orqali o'yinlarni tomosha qilar ekanmiz, stadiondagi muhit ajoyib ekanligini aytib o'tmasak bo'lmaydi. Bir so'z bilan aytganda hammasi zo'r. Yana bir narsani aytish lozim, Evropada yorqin va og'ir mavsumni o'tkazgan aksariyat yulduzlar mundialda o'zlarini ko'rsata olishmadi. Buni esa charchoq alomatlari bilan izohlasak bo'ladi, vaholanki ularning iqtidoriga hech kim shubha qilmaydi.

2. Braziliya - Xorvatiya, Xorvatiya - Meksika, Gollandiya - Ispaniya, Urugvay - Italiya, Argentina - Eron, Franciya - Shveycariya Germaniya - Portugaliya hamda Rossiya - J.Koreya uchrashuvlarini alohida qiziqish bilan tomosha qildim va shu o'yinlar menga maqul keldi. Albatta, bu erda oddiy o'yinning o'zi yo'q. Hamma bir-biri bilan oxirigacha kurashmoqda. Hozircha Meksika, Gollandiya, Urugvay va Franciya ishtirokidagi o'yinlar ko'proq yoqdi deya olaman.

3. OFKga azo davlat bo'lganimiz uchun ham Osiyo jamoalarining jahon chempionatidagi ishtiroki hech kimni befarq qoldirmasa kerak. Musobaqa boshlanmasidan oldin Osiyoning to'rtta jamoasidan hech bo'lmasa ikkitasi keyingi bosqichga chiqishini taxmin qilgandim va asosiy urg'uni Yaponiya bilan Janubiy Koreyaga bergandim. Biroq Yaponiya atigi bir ochko bilan guruhda oxirgi o'rinni egalladi. Janubiy Koreyaning ham guruhdan chiqishi juda qiyin bo'lib qoldi. Avstraliya esa har uchala bahsda mag'lubiyatga uchrab turnirni tark etdi, lekin ularning o'yinini yomon deb bo'lmaydi. Avstraliya hozirgi o'yinini saqlab qolsa, kelasi yil o'zida bo'lib o'tadigan Osiyo Kubogida bemalol chempionlik uchun kurasha oladi. Eron termasi masalani bugun hal qiladi. YO guruhdan chiqadi yo narsalarni yig'ishtirib uyga qaytadi. Bundan tashqari, Osiyo vakillari orasida hozircha gol urmagan birgina Eron bo'lib turibdi. Menimcha, Osiyo jamoalari musobaqada o'z darajalarida ishtirok etishdi, shunga qaramay Yaponiya va Koreyadan ko'proq narsa kutgandim.

4. O'zimni Evropa futboli bo'yicha jonkuyar ishqiboz deb hisoblamayman. Shuning uchun ochig'ini aytishim kerak, mashhur nomlarni inobatga olmaganda ko'pchilik futbolchilarni tanimas ekanman. Aksariyat o'yinchilarni mundial orqali bilib oldim. Jamoalardan bemalol Kosta-Rika, Kolumbiya va AQSH kashfiyot bo'ldi deya olaman. Bu jamoalarning o'yin olib borish usuli yoqdi. Futbolchilardan esa Xaver Ernandes, Edinson Kavani singari futbolchilarni o'zim uchun yana bir bor kashf qildim.

5. Fikrimcha, buyog'iga Braziliyani to'xtatib qolish qiyin bo'ladi. Musobaqa mezbonlari bemalol finalgacha borish imkoniyatiga egalar. Bundan tashqari, Franciya bilan Argentinada ham imkoniyat bor deb o'ylayman. Menimcha, mazkur JCHni Evropadan faqat Franciya yutishi mumkin. Chunki taxminimcha Germaniya va Gollandiya yo'lda qoqilishadi. Braziliya shundoq ham kuchli, Argentinani Messining bir o'zi elkasida ko'tarib chempionlik sari etaklashi mumkin. O'ylashimcha, jahon kubogi bu safar Janubiy Amerikada qoladi.

“SA” anketasi. Besh savolga besh javob (X.Xoliqov varianti)