Олмалиқликлар билан хайрлашган марказий ярим ҳимоячи куни-кеча янги жамоаси билан шартнома имзолади. Шу муносабат билан Саламатдан интервью олдик.

- “Бухоро”га айтишингиз қандай амалга ошди?
- Бу ерга мен жамоа мураббийи Тачмурод Агамуродовнинг таклифига биноан келдим. Маълум муддат машғулотларда иштирок этганимдан сўнг, клуб менга шартнома таклиф қилди. Битимдаги шартлар ҳар икки томонни тўла қониқтиргани боис, унга имзо чекдим.

- Айтишларича сизга олий лиганинг бошқа жамоаларидан ҳам қизиқиш бўлган экан. Шу ростми?
- Ҳа, яширмайман таклифлар бор эди. Аммо Бухоронинг таклифи менга бошқаларникидан маъқул келди. Боз устига уйимга яқин.

- “Насаф”га ўтишингиз борасида хабарлар чиққанди. Наҳотки чемпионлар лигасида иштирок этишни истамаган бўлсангиз?
- Менимча ҳар қандай футболчи нуфузи юқори бўлган мусобақаларда қатнашишни хоҳлайди. Тўғри, қаршиликлар ҳам мени ўз сафида кўришни истаб, таклиф қилганди. Лекин мен аввалроқ Тачмурод Агамуродов билан келишиб қўйгандим ва у кишига вада бергандим. Шундан сўнг “Насаф”га узуримни айтдим.

- Янги жамоага мослашиб кетиши жараёни қандай кечмоқда?
- Ёмон эмас. “Бухоро”нинг таркиби бу йил деярли янгитдан тузилмоқда деса ҳам бўлади. Менимча мавсум стартига қадар бир-биримизни сўзсиз тушунадиган даражага чиқамиз.

- Сиз харакат қиладиган марказий ярим ҳимояда рақобат бироз кучлидек кўринмоқда. Фикримизга қўшиласизми?
- Ҳақиқатдан ҳам шундай. Бу чизиққа яна бир нечта ўйинчи келиши ҳам мумкин. Шунга қарамай “Бухоро”да ҳам асосий таркибда ўйнаш учун бор кучим билан харакат қиламан. Рақобатни эса бўлгани яхши.

- Дарвоқе, ўтган йили “Олмалиқ”да ҳам асосий таркиб ўйинчисига айланиб улгургандингиз. Қолаверса бу клубда молиявий муаммолар йўқ дейишади. Игорь Шквирин сизни бу йил ҳам жамоасида олиб қолишга харакат қилгандир?
- Назаримда унақага ўхшамади. Қолишимни жуда исташганида бу борада музокара ўтказишарди. Ҳеч қандай нидо чиқмагач, олдимда турган бошқа вариантлар ҳақида ўйлай бошладим.

Исломбек Рустамбеков.

Саламат Қуттибоев: “Бухоро” билан келишиб қўйгач, “Насаф”га узуримни айтдим”