Bu uchrashuvda himoyachi Salim Mustafoev asosiy tarkibda maydonga tushib, to'liq 90 daqiqa to'p tepdi. Bugun tug'ilgan kunini nishonlayotgan futbolchining o'yin borasidagi fikrlari quyidagicha bo'ldi.

O'yin haqida
- Namanganda yangi mavsumning ochilish o'yin bo'lgani uchun bahs ikki jamoa uchun ham qiyin kechdi. Biz avvaliga 0:1 hisobida mag'lubiyatga uchrayotgandik, biroq ikkinchi taymda uchta to'p kiritishga muvaffaq bo'ldik va o'yin oxirlarida yana gol o'tkazib yubordik. Ikkinchi golni o'tkazib yuborganimizdan so'ng biroz xavotir bosdi, o'yinimizda pala-partishlik yuzaga keldi, lekin g'alabani saqlab qola oldik.

Stadiondagi muhit haqida
- Stadion to'ldi, bu esa har ikki jamoaga maqul keldi. Har bir futbolchi ko'plab tomoshabinlar qarshisida to'p tepishni xohlaydi. Namanganlik muxlislarning nihoyatda ko'pligi bizga bosim o'tkazgani yo'q, aksincha bundan xursand bo'ldik.

Asosiy tarkibda maydonga tushgani haqida
- Bundan oldingi ikki uchrashuvda (OCHL bahslarida) maydonga tusha olmadim. "Navbahor" bilan o'yinda esa murabbiylar menga imkon berishdi va jamoamga foyda keltirishga harakat qildim. Keyingi bellashuvlarda ham boshlang'ich tarkibga kirish uchun bor kuchimni ishga solaman.

"Lokomotiv" matbuot xizmati

Salim Mustafoev: "Keyingi o'yinlarda ham asosiy tarkibda tushishga harakat qilaman"