Mashg'ulotlardan so'ng jamoaning mahoratli futbolchisi Samandar Shukrullaevning unga bo'layotgan takliflar va boshqa mavzularda fikrlari bilan qiziqdik.

Toshkentdagi yig'in haqida

"Poytaxtdagi yig'inimiz juda yaxshi o'tmoqda. Mashg'ulotlarda jismoniy va taktik tomondan ishlayapmiz. Oldingi uchrashuvlarimiz issiq va noqulay vaqtda o'tganligi uchun ko'p kuch sarflashimizga to'g'ri keldi. Vahimali joyi yo'q. Tanaffus tiklanib olishimiz uchun ayni vaqti hisoblanadi",- deydi Samandar Shukrullaev.

Qiyinchiliklar ortda qoldi

"Ha, mavsumga ispaniyalik murabbiy boshchiligida tayyorgarlik ko'rdik. Ikki murabbiyning falsafasi va uslubi boshqa-boshqa. Aleksandr Xomyakov "Mashal" uchun begona emas. Qiyinchiliklar ortda qoldi. Bundan buyon o'yinimizni mukammal holatga keltirishga harakat qilamiz. Hammasi oldinda",- deydi futbolchi.

Yangi chorlovlarga tayyormi?

"O'tgan mavsum tajriba orttirib olishim uchun juda qulay imkoniyat bo'ldi. Murabbiylarimga ishonch bildirishayotgani uchun rahmat aytaman. O'yinimdagi xato va kamchiliklarni bartaraf etishga harakat qilaman. Qiziqish va takliflarga kelsak, hozirda "Mashal" bilan shartnomam bor. Barchasini klub hal qiladi",- deydi Samandar Shukrullaev.

Kimga tayanadi? Agentlargami yoki o'zi mustaqil qaror chiqaradimi?

"Hozircha agentim yo'q. Agarda takliflar bo'lsa, murabbiylarim bilan maslahatlashib yakuniy qarorni chiqaraman",- deydi Samandar Shukrullaev.

Samandar Shukrullaev: "Taklif bo'lsa kimga tayanaman? Agentim yo'q, murabbiylarim bilan maslahatlashaman"