- Kubok doirasidagi ushbu o'yin guruhda jamoalarning qaysi o'rinlarni egallashini aniqlab berdi. O'yingacha biz pley-off bosqichini hal qilib bo'lgandik. Bu borada yigitlar bilan gaplashib olgandik. Bugun esa juda yomon o'yin namoyish qildik. Tezlik, koncentraciya etishmadi. Ayrim futbolchilar esa maydonda deyarli ko'rinmadi. "Olimpik"ni g'alaba bilan tabriklayman, ular guruhdan chiqish uchun borini berib harakat qilishdi, yaxshi o'yin ko'rsatishdi. Umuman olganda, bu ruxiy holat bilan bog'liq. Termalarning o'yinlari yaqinlashib kelmoqda, bu esa klublarga biroz dam beriladi degani. Biroq jamoa uchun bu tasir qilmasligi kerak. Chunki muxlislarimiz oldida biroz qarzlarimiz bor. Va har bir o'yinda biz bor kuchimiz bilan o'ynab, sifatli o'yin ko'rsatishimiz kerak.

- Toshkentdagi o'yinlar "Navbahor" uchun qiyin o'tyapti. Bu nima bilan bog'liq?

- Faqatgina bu erdagi emas barcha o'yinlar shunday o'tmoqda. Keling, bu kubok o'yini bo'lgani uchun etibordan chetda qoldiramiz. Chunki bu o'yinning ahamiyati boshqacha. Turnir jadvalidagi holat muhim ahamiyat kasb etadi. Balki, o'yinga bo'lgan ruxiy tayyorgarlik ham muhim rol o'ynagan bo'lishi mumkin. Umuman olganda, fikr qildirish qiyin. Masalan, chempionatda parokanda bo'lib ketgan o'yinlarimiz yo'q. Chempionatda mag'lub bo'lgan o'yinlarimizda eng kamida durangga loyiq edik. Bugun esa to'g'risini aytaman, jirkanchli o'yin ko'rsatdik.

- Bugungi mag'lubiyat jamoaning ruxiy holatiga qanday tasir o'tkazadi?

- Ilk navbatda, biz asosiy tarkibda tushmayotgan futbolchilarga imkoniyat berdik. Bu esa fikrlashga biroz tasir o'tkazadi. Yuqori o'rinlar uchun kurashishga jamoada zaxira o'rindig'i ham uzun bo'lishi kerak deb hisoblayman. Shuningdek, maydonga tushadigan futbolchilarning sifati ham belgilangan darajada bo'lishi lozim. Afsuski, bugungi o'yin orqali biz ko'p narsalarni ko'rib oldik. Hozircha jamoa yuqori jismoniy holatiga kirib olmadi. Buning o'ziga hos sabablari bor. Bu bahs barcha tomonlama foydali bo'ladi. O'yinni chuqur taxlil qilib chiqamiz, xatolarni ko'ramiz, shuningdek, shu orqali tarkibni optimallashtirishni ham ko'rib chiqamiz. Umuman olganda buni bir marta amalga oshirgandik ham. Navbatdagi bosqichga chiqqanimiz sababli rotaciya qilib ko'rgandik. Afsuski, asosiy tarkibda tushgan ayrim futbolchilar o'z darajasini ko'rsata olishmadi.

- Demak, ikkinchi davrada tarkibni kuchaytirish ishlari bo'lib o'tadi.

- Barchasini vaqt ko'rsatadi. Hozircha bizni barchasi qanoatlantirmoqda. Klub o'z imkoniyatlaridan kelib chiqqan holda ishlamoqda. Shuningdek, bizda belgilangan byudjet bor. Undan ko'prog'ini ishlatib tashlay olmaymiz. O'z vaqti kelganida tarkib borasida ham o'ylaymiz. Ayni damda bir qancha futbolchilar etarlicha o'yin amaliyotiga ega bo'lishmayapti. Balki, shu sababli ular o'z darajasini yo'qotib qo'yishgandir. Shu boisdan tajriba va o'yin amaliyotiga ega bo'lishi uchun ayrim futbolchilarni ijaraga berish variantlarini ko'rib chiqarmiz. Natija sababli barcha futbolchiga imkoniyat bera olmaymiz. Chunki natija bizga doimo bosim berib turadi. Tarkibni kuchaytirish borasidagi gaplarni hali birgalikda o'ylab ko'ramiz.

- "Olimpik" bilan Namangandagi bahs davomida Siz futbolchingiz maydonda yotib olganida uni tezroq o'rnidan turib, o'yinga qo'shilishini talab qilgandingiz. O'shanda Siz vaqtni cho'zish futbolning zarariga ishlashini aytgandingiz. Bugun esa "Olimpik" futbolchilari o'zlarini boshqacha tutishdi. Bu holatga qanday qaraysiz?

- Bunday holatlar tizimsiz bo'ladi. Ha, raqiblar vaqt cho'zgan bo'lishi mumkin. Bunday narsalar murabbiylar shtabining yo'nalishiga bog'liq deb o'ylayman. Futbol o'yinlarida, ayniqsa, so'nggi daqiqalarda bunday ayyorliklar ko'p bo'lib turadi.

Samvel Babayan: "Asosiy tarkibda tushgan ayrim futbolchilar o'z darajasini ko'rsata olmadi"