Samvel BABAYAN ("Paxtakor" menejeri): - Ikkinchi bo'lim boshida yigitlarda ozgina xotirjamlik sezildi va ularga avvalgidek suratda o'ynash lozimligini aytdim. Ular buni uddalashdi hamda muxlislarni chiroyli futbol bilan xursand etdik. Yil davomida olib borgan mehnatimiz samara berdi. Buning uchun butun jamoa birgalikda mehnat qildi.

Bizga bir-birining o'rnini bosadigan o'yinchilar borligi qo'l keldi. Hali mavsum tugamadi. "So'g'diyona" va "Bunyodkor"ga qarshi bellashuvlarda ham ishqibozlarga maqul keladigan o'yin namoyish etishga intilamiz.

Menejerlik bilan shug'ullanishni xohlovchilar jamoani boshqarish uchun tegishli licenziya va futbol haqida tushunchaga ega bo'lishi kerak. Men hamisha jamoa ichida bo'lganman va murabbiylik kurslarining barchasida tahsil olganman. Boshqalar menejerlikni istagan taqdirda shu jihatlarni ham inobatga olishi darkor.

Men uchun har bir o'yin eng muhim. Chempionatni Andijonda boshladik. O'shanda meni futbolchilarning rasmiy o'yinda qanday futbol ko'rsatishi o'ylantirayotgandi. O'sha bellashuvda yigitlar ko'rsatmalarimga amal qilib, men istagan o'yinni namoyish qilayotganini ko'rdim. Shu sababli har bir bellashuv katta ahamiyatga ega bo'ldi. Endigi maqsadimiz Osiyo Chempionlar ligasida finalga etib borish. Shunga yarasha raqobatbardosh jamoa tuzishga urinamiz. O'yindan keyin futbolchilarga ham shuni takidladik.

Jamoamizda etakchilar bor. Lekin g'alabada jamoaning bir oila kabi uyushgani va mehnat qilgani qo'l keldi. Aytaylik, Maxaradze "Lokomotiv"da ko'p qizil kartochka olardi, jamoa bilan birinchi ligaga tushib ketgandi. Uni jamoaga taklif etdik va Kaxi bugungi kunda kiyinish xonasi va maydonda etakchilardan biriga aylangan. Yoki Pardaev birinchi davrani zaxirada o'tkazgandi. "Paxtakor"da esa ikkinchi davrada bir qator muhim gollarga mualliflik qildi. Har bir o'yinchi shunday tarzda o'zini ko'rsatdi. Hozir ko'plab futbolchilarga takliflar bor, lekin ular jamoani tark etmasliklarini bildirishdi. Oldimizga qo'yilgan maqsad sari olg'a qadam tashlashda davom etamiz.

Men har kuni o'z ustimda ishlash va yangi narsalarni o'rganishda davom etaman. Xiddink yoki Melensten singari murabbiylardan bazi jihatlarni o'rganganman. Mini-futbol jamoamizdan ham bazi narsalarni o'zlashtirganman va buni aytishdan uyalmayman. Chunki murabbiylik ishida barchadan o'rganish kerak va o'zing uchun yo'nalishni belgilab, futbolchilarga fikrlaringni tushuntirib berishing kerak. Agar o'yinchilarga nimani ko'rishni xohlayotganingni tushuntira olmasang, unda jamoani boshqara olmaysan.

Ushbu chempionlik faoliyatimda erishgan eng qiyin chempionligim bo'ldi. Hozirgacha bir bor "Navbahor" va 8 marta "Paxtakor" bilan oltin medallarga ega chiqqanman. "Lokomotiv", "Nasaf" va "Bunyodkor" bilan shiddatli kurash kechdi. Hozirgi tarkibga Odil Ahmedovni qo'shadigan bo'lsak, men ishlagan paytdagi eng kuchli jamoaga aylanadi.

Biz moliyaviy tarafdan eng yaxshi imkoniyatlarga ega emasmiz. Oliy ligada bu borada 5-6-o'rinlardagi jamoamiz. Shu sababli byudjetimizning malum qismini o'zimiz ishlab topishga intilamiz. Futbolchilarga esa maosh va mukofot pullarini vaqtida to'lab boryapmiz. Hech qachon o'yinchilarga oldindan biror narsa uchun vada bermaymiz. Klub va jamoada barcha o'z ishini professionallarga xos, masuliyatni his etgan holda bajaradi.

Samvel Babayan: "G'alabani muxlislarimizga bag'ishlaymiz"