Франция терма жамоаси билан жаҳон чемпиони бўлган ҳимоячи Самюэль Умтити агар 10 сентябргача янги клуб топа олмаса, футболчилик фаолиятини якунлаш ниятида. Бу ҳақда француз нашри L'Equipe хабар берди.

Маълумотларга кўра, 31 ёшли футболчи Франция, Италия, АҚШ ва Яқин Шарқ мамлакатларидан таклифлар олган, аммо улар спорт нуқтаи назаридан уни қониқтирмаган. Умтити фақат бир неча ойлик шартнома учун жамоага қўшилишни истамайди — у ҳақиқий ўйин амалиётига эга бўладиган лойиҳани изламоқда.

Футболчи июль ойидан бери клубсиз қолган, чунки у "Лилль" жамоасини тарк этган. 2024 йилнинг январидан бери у тиззасидаги жарроҳлик амалиёти сабаб майдонга тушмаган, аммо ҳозирда тўлиқ тиклангани айтилмоқда.

Умтити Франция терма жамоаси сафида 31 ўйин ўтказган ва 4 та гол урган. У 2018 йилда миллий жамоа билан Жаҳон чемпиони бўлган. Шунингдек, у “Барселона” таркибида икки марта Испания чемпиони, уч марта Қирол кубоги ва икки марта Суперкубок соҳиби бўлган. Илгарироқ "Лион" ва "Лечче" жамоаларида ҳам тўп сурган.

Самюэль Умтити 10 сентябргача янги жамоа топмаса, фаолиятини якунлаши мумкин