Бу сафарги қарама-қаршиликни ҳам кескин тарзда ўтишига шубҳа йўқ. Ҳар икки жамоа аъзолари ҳам 8-турда рақибларига имкониятни бой беришгани учун майдонга фақат ғалабани кўзлаб тушишларини эҳтимоли юқори. “Навбаҳор”ни зиммасидаги масъулият юки рақибникига қараганда оғирроқ. Сабаби, “лочинлар” мамлакат кубогининг нимчорак финал дастлабки баҳсида Наманганда Исмоилов шогирдларига 0:1 ҳисобида имкониятни бой беришганди. Мазкур учрашув олдидан наманганликлар ярим ҳимоячиси Санжар Асқаралиевнинг фикрлари билан қизиқдик:

- Хабарингиз борки, олдинги турда Тошкентда “Пахтакор” меҳмони бўлиб, йирик ҳисобда имкониятни бой бергандик. Аслини олганда “Пахтакор”га қарши баҳсни ёмон тарзда ўтказмадик. Фақат дарвозамизга белгиланган пенальти ижобий натижага бўлган умидимизни сўнишига олиб келди. Эндиликда ушбу мағлубиятни унутган ҳолда “Қўқон-1912” жамоасига қарши ўйинга тайёргарлик кўрмоқдамиз. Мақсадимиз муносиб тарзда шуғулланиб, ғалаба қозониш. Айнан шу орқали мухлисларимизни ҳам кайфиятини кўтаришни ният қилганмиз. Кўпчиликка яхши маълумки, мамлакат кубогининг нимчорак финал дастлабки ўйинида “Қўқон-1912” жамоасига ўз майдонимизда имкониятни бой бериб қўйгандик. Ушбу мағлубиятни тасодиф эканлигини амалда исботлаш учун ҳам бор куч ва маҳоратимизни ишга соламиз. Бўлажак ўйинда ютуққа эришиб, Қўқонда бўлиб ўтадиган жавоб учрашуви олдидан руҳиятимизни ҳам кўтариб оламиз деган умиддамиз", - дейди Асқаралиев.

"Навбаҳор" матбуот хизмати

Санжар Асқаралиев: “Мақсадимиз ғалаба қозониш”