Maydon egalari joriy mavsum hisobidan ilk bor o'z maydonlarida g'alabani tantana qilishdi. "Qo'qon-1912"ning gollariga Ivan Yosovich va Sardor Azimov mualliflik qildi. O'yindan so'ng ikkinchi gol muallifi Azimov saytimizga fikrlarini bildirdi.

"Biz har bir o'yinga raqibdan kelib chiqib bir hil tayyorgarlik ko'ramiz. Superligada kuchsiz jamoa qolmagan. Har bir klub ochko uchun kurashmoqda. O'z maydonimizdagi uzoq kutilgan g'alabani qo'lga kiritganimizdan xursandmiz. O'ylaymanki bu oxirgisi bo'lmaydi. Yana g'alabalar qozonib muxlislar ishonchini qaytarishga harakat qilamiz.
"Surxon" o'z o'yinini topib olganidan xabarimiz bor edi. Nazariy mashg'ulotlarda so'nggi uchrashuvlarini ko'rib diqqat bilan o'rganib chiqqandik. Murabbiylar ko'rsatmasini to'g'ri bajarganimiz samara berdi.
Ko'rgan bo'lsangiz oldingi bellashuvlarda ham kombinacion futbol ko'rsatayotgandik. Raqiblardan kelib chiqib murabbiylarimiz taktika tanlashadi. "Surxon" bilan bahsda standart vaziyatlardan foydalanishga urindik.
Golni noodatiy tarzda nishonlashni o'tgan mavsumdan boshladim. Joriy yilda ham buni davom ettirmoqdaman. Chunki Sanjarbek degan yosh ukam bor. Kupega kelsak, instagram ijtimoiy tarmog'ida Dili.me degan blogerni ko'pchilik yaxshi taniydi. Dastlab kuzata turib kupe o'yini yoqib qoldi. O'shanda men ham ko'rib amalga oshirish istagi paydo bo'ldi",- deydi Sardor Azimov.

Sardor Azimov: "O'ylaymanki, bu Qo'qondagi oxirgi g'alabamiz bo'lmaydi"