Ushbu turnirda hamyurtimiz Sardor Rashidov to'p tepayotgan "Al Jazira" klubi ham o'ynaydi. "Al Jazira" o'zining ilk uchrashuvini ertaga "Oklend Siti" klubiga qarshi o'tkazadi. O'yin bizning vaqt bilan 22:00da boshlanadi.

Shuni aytish lozim, Sardor Rashidov bunday nufuzli musobaqada maydonga tushadigan o'zbekistonlik birinchi futbolchi bo'ladi. Uning jamoasi dastlabki uchrashuvga qizg'in hozirlik ko'rmoqda. Bungacha klublar o'rtasidagi jahon chempionatida BAAdan ikkita jamoa qatnashgan. Bular "Al Ahli" (2009 yil) va "Al Vahda" (2010 yil) klublari. "Al Jazira" esa mazkur mamlakatning uchinchi klubi bo'ladi.

"Al Jazira" Abu Dabidagi eng keksa klub hisoblanadi. Bu jamoa 1974 yil tashkil topgan. Ushbu klub shu paytgacha ikki bor ichki chempionatda, uch marta Prezident Kubogida va bir marta Liga Kubogida zafar quchgan. O'tgan yillar mobaynida "Al Jazira" safida bir nechta futbolchilar to'p tepishgan.

Masalan, 1995 yil FIFA talqiniga ko'ra "Yilning eng yaxshi futbolchisi" deb topilgan Jorj Vea 2001-2003 yillarda "Al Jazira"da faoliyat olib borgan va jamoaga sardorlik qilgan. Shuningdek, Mirko Vuchinich, Rikardo Oliveyra, Lassana Diarra kabi futbolchilar ham o'z vaqtida shu jamoada o'ynashgan.

"Al Jazira" BAAda eng yaxshi futbol maktabiga ega klublar sirasiga kiradi. Bu jamoadan Ali Mabxut kabi mashhur futbolchining etishib chiqishiyoq ko'p narsadan darak beradi. 2015 yilgi Osiyo Kubogida eng ko'p gol urgan hujumchi o'tgan 20 yil ichida BAA terma jamoasining eng yaxshi to'purarlaridan biri bo'lib turibdi. O'tgan mavsum u "Al Jazira" tarkibida 33ta gol urishga muvaffaq bo'ldi.

Bundan tashqari, hamyurtimiz Sardor Rashidov ham mazkur klub tarkibida faoliyat yuritmoqda. Demak, uni ham hayajonli damlar kutib turibdi deya olamiz. Jamoa bosh murabbiyi esa taniqli mutaxassislardan biri Xenk ten Kate. Albatta, ko'pchilik o'zbekistonlik muxlislar klublar o'rtasidagi jahon chempionatida Sardor Rashidov sabab "Al Jazira"ga muxlislik qilishlari tabiiy hol. Shu o'rinda biz Rashidov va uning jamoasiga omad tilab qolamiz.

Sardor Rashidov klublar o'rtasidagi jahon chempionatida o'ynaydigan o'zbekistonlik dastlabki futbolchi