Kecha mahalliy "Linc"ga qarshi maydonga chiqqan qatarliklar safida Rashidov ikkinchi bo'limda maydonga tushib yangi klubidagi debyutini o'tkazdi.

"Yangi jamoaga kirishib ketishimda muammo bo'lmadi. Bu futbolchi uchun juda muhim. Meni klubda yaxshi kutib olishdi, ayni paytida Avstriyada mavsum oldi mashg'ulotlarida ishtirok etyapmiz. Tayyorgarliklar yomon emas. Kecha o'rtoqlik o'yinida maydonga tushdim. Men bilan birga yana bitta yangi futbolchi debyutini o'tkazdi. Birinchi bo'limdan keyin hisob 0:0 edi, ikkinchi bo'limda esa 5:0 natijasi bilan g'alaba qozondik", - deydi Sardor Rashidov.

- Mashg'ulotlarda qanday o'zgarishni sezdingiz?

- Ko'pincha arab klubilarining mashg'ulotlari yuqori saviyada bo'lmasligi haqida aytishar edi. Ammo o'zim guvohi bo'ldimki, unday emas ekan. Barchasi yaxshi, Evropalik mutaxassislar o'z uslublarida jamoani kerak bo'lsa kuniga uch mahal mashg'ulot o'tkazishga undayaptilar.

- Xaviga qarshi o'yinni kutyapsizmi?

- To'g'risini aytsam ko'proq chempionatni boshlanishini kutyapman. Boisi jamoaning oldiga jiddiy maqsad qo'yilyapti.

- Jamoadagi legionerlarning munosabati qanday?

- Aynan ular bilan chiqishib ketishim oson bo'ldi.

- Til borasidagi muammoni qanday hal etyapsiz, tarjimon murabbiyning ko'rsatmalarini to'g'ri tushuntirib bera olyaptimi?

- Hozircha maydonda ishlatiladigan gaplarni o'rganib oldim. Sekin asta lug'atimni kengaytirib borishga harakat qilyapman. Hozircha tarjimonim bor va u as qotyapti.

- Avstriyada Franciyaning ikki klubiga qarshi o'ynashilar haqida xabar chiqdi, bu o'yinlarga qarshi tayyorgarlik qanday ketyapti?

- Kichik xatolik bo'lgan ko'rinadi. Biz Franciya klublariga qarshi emas, italiyaliklar bilan o'ynaymiz. Raqiblarimiz "Verona" va "Udineze" bo'ladi. Bu o'yinni nafaqat men, balki barcha jamoadoshlarim kutyapti. O'zimizni sinab olishimiz uchun ham juda muhim.

- Yangi mavsumda Sizga omad tilaymiz!

- Rahmat, men ham o'z navbatida muxlislarimizning ishonchini oqlash uchun yurtimiz sharafini munosib himoya qilishga vada beraman.

Nodirxo'ja Yuldashev

Sardor Rashidov: "Udineze" va "Verona"ga qarshi bahslarga tayyorgarlik ko'ryapmiz"