Uchrashuvda mezbonlarning ikkinchi goliga yarim himoyachi Sardor Telyakov mualliflik qildi. O'yindan so'ng uning fikrlarini tingladik.

- O'yin haqida...

- Tanaffusdan keyingi birinchi o'yin doim qiyin kechadi. To'g'ri o'rtoqlik uchrashuvlari orqali sport formamizni ushlab turdik. Lekin rasmiy va o'rtoqlik o'yini o'rtasida katta farq bor. Birinchi davradagi o'yinimizni ko'rsatishimiz uchun biroz vaqt zarur. Mazkur omillar hisobiga "Zomin"ga qarshi harakatlarimiz biroz o'xshamagan bo'lishi mumkin.

- Raqibning turnir jadvali quyida borayotgani futbolchilarni xotirjamlikka berilishiga sabab bo'lmadimi?

- To'g'ri "Zomin" quyi o'rinda ketmoqda. Lekin bu ularning kuchsizligini, xotirjam yutishimizni anglatmaydi. Pro ligadagi har bir jamoaning maqsadi bor. Ayniqsa oxirgi o'rindagi jamoalar kuchli raqiblarga qarshi ikki hissa kuch bilan o'ynaydi. Biz har bir raqibni hurmat qilgan holda maydonga chiqishimiz kerak. Hozir jamoa kuchli yoki kuchsizga ajratadigan payt emas.

- Ikkinchi bo'limda jamoada toliqish bordek sezildi...

- O'z o'yinimizni topib olish qiyin kechdi. 3:0 hisobida oldinda borayotganimizdan keyingina o'zimizga keldik. Ikkinchi bo'lim yomon o'tmadi, deb o'ylayman. Tan olish kerak biroz charchoq borligi bilindi. Yakunda darvozamizdan to'p olib chiqdik.

- Oldinda "Andijon" bilan murakkab bellashuv kutib turibdi. Nima deb o'ylaysiz, "Andijon"ga qarshi o'yinlar chempionlik masalasini hal qilib beradimi?

- "Andijon" bilan o'ziga hos derbi va 6 ochkolik o'yin bo'ladi. Faqatgina bu klub bilan emas, barcha raqiblar bilan o'yinlardagi ochkolar chempionlikni hal qiladi. Turnir jadvaliga o'z tasirini o'tkazadi. Shunday ekan har bir o'yinga jiddiy qaraymiz va g'alaba uchun to'p tepamiz.

Abdulaziz Iskandarov suhbatlashdi

Sardor Telyakov: "Pro ligada chempionlikni faqat "Andijon" bilan o'yin hal qilmaydi. Har bir raqibga jiddiy qaraymiz"