Saudi Pro League Season Awards тақдирлаш маросимида "Ал-Иттиҳод" жамоаси сардори Карим Бензема мавсумнинг энг яхши ўйинчиси, жамоа бош мураббийи Лоран Блан эса энг яхши мураббий деб топилди.

Бензема мавсум давомида 21 та гол урди ва 9 та голли узатма берди. Француз футболчининг 30 та самарали ҳаракати лигадаги энг юқори кўрсаткич бўлди. Шу билан бирга, Саудия Арабистонининг энг яхши маҳаллий футболчиси унвонини "Ал Ҳилол" аъзоси Салим Ал Довсари қўлга киритди.

Блан чемпионатдаги дебют мавсумидаёқ "Ал Иттиҳод"ни чемпионликка олиб чиқди. Француз мураббий биринчи мавсумда бунга эришган тўққизинчи мутахассис бўлди. Бу унинг Франциядан ташқарида олий дивизиондаги биринчи унвонидир.

Бундан ташқари, Криштиану Роналду кетма-кет иккинчи мавсумда чемпионатнинг энг яхши тўпурари бўлди. "Ал Насср" сардори 25 та гол уриб, "Ал Аҳли" ҳужумчиси Айвен Тоюнини 2 та голга ортда қолдирди. Ҳозирда португалиялик футболчи Саудия Арабистони чемпионатида 77 та ўйинда 74 та гол урган ҳолда, мусобақа тарихидаги тўпурарлар рўйхатида 9-ўринни эгаллаб турибди.

Саудия Арабистони чемпионатида мавсумнинг энг яхшилари аниқланди