Oz bo'lsa-da, o'quvchilarimiz mazkur savobli ishda ishtirok etdilar. Sardor Komilov boshchiligidagi "Sayyod.com" esa shu kuni o'zi uchun fantastik darajadagi mablag'ni yig'ib, bemorlarning sog'lig'i yo'lida muhim rol o'ynaydigan 17.695.000 so'm qiymatiga ega qimmatbaho dori-darmonlarni xarid qildi.

"Saytga tashrif buyuruvchilar va o'quvchilarimdan shu bugun yanada faxrlandim! Saytimiz auditoriyasi men o'ylagandan ham oliyjanob, mehribon va eng alo insonlardan iborat ekan! Bugungi kunda sayt orqali xayriya uchun bir kunda shuncha pul yig'ish fantastika! Bilmadim, boshqa tv, radio va gazetalar orqali qanday akciyalar va natijalarga erishishadig'ku, lekin shu sayt orqali bunday natijalar men uchun mo'jiza! Chin dildan HURMAT vaTASHAKKUR!", - deydi Sardor Komilov o'z saytida.

Xabaringiz bor, "Sayyod.com" sayti shou-biznes olamida faoliyat yuritib kelayotgan mashhurlar bilan muntazam aloqalarni yo'lga qo'ygan. Xayriya tadbirlarida ularning ham hissalari katta. Ayniqsa, sanat olami vakillarining fan klub vakillari xayriya tadbirlaridan tortib, qon topshirish akciyalarigacha muntazam ishtirok etib keladilar.

Shunday ekan, nima uchun biz ham shu tadbirda ishtirok etmaylik? Bundan buyon saytimiz o'quvchilarining roziligini inobatga olgan holda biz ham endi har oyning birinchi jumasida mazkur tadbirda qatnashamiz. Menimcha, oliy liga jamoalarining ishqibozlari g'oyamizni qo'llab-quvvatlaydilar va muhtojlarga o'z himmatlaridan kelib chiqib, xayriya ishlarida ishtirok etadilar.

Keyingi tadbirlarda mashhur futbolchilarimiz ham ishtirok etishni maqsad qildilar. Akciya davomida turli xil qiziqarli o'yinlar tashkil qilib, bemor va ishtirokchilarning kayfiyatlarini ko'tara olamiz degan umiddamiz.

Keyingi akciya 6 sentyabr kuni bo'lib o'tadi. Shu kuni O'zbekiston milliy terma jamoasi Ommanda Iordaniya terma jamoasiga qarshi muhim uchrashuvda maydonga tushadi. Shu kuni terma jamoamizga omad tilagan holda xayriya akciyada ishtirok etsak, maqsadga muvofiq bo'lar edi.

18 avgust kuni FIFA.uz sayti ishtirokchilarini taqdirlash marosimi bo'lib o'tadi. Mazkur tadbir davomida o'zimiz uchun xayriya akciyani kichik qismini tashkil qilamiz va tushgan pullarning barini, tiyin-tiyinigacha 6 sentyabr kuni "Sayyod.com" saytiga topshirishni niyat qildik. Bu tadbirda Odil Ahmedov boshchiligidagi MTJ yulduzlari ishtirok etishni reja qildilar. Virtual futbolimizning eng yaxshi futbolchilari deb topilgan o'yinchilar esa g'olib va sovrindorlarga sovg'alarni topshiradilar.

Shu o'rinda o'z loyihalarida ishtirok etish imkonini berganligi uchun "Sayyod.com" sayti rahbari Sardor Komilovga saytimiz ijodiy guruhi va o'quvchilari nomidan o'z minnatdorchiligimizni bildiramiz!

P.S: Bu maqolani yozishdan maqsad qilgan xayriya ishni maqtanish emas. Aksincha, keyingi tadbirlar uchun ishtirokchilar sonini oshirib, bemorlarning joniga oro kirish.

Nodirxo'ja Yuldashev

"Sayyod.com" xayriya tadbirida 17 million so'm yig'di!