- O'yindan to'liq qoniqmadim, lekin natija chiroyli bo'ldi. Bugun biz chempionat peshqadamlaridan biriga qarshi o'ynadik. OKMK - juda kuchli jamoa. G'alaba uchun yigitlarga katta rahmat, futbolchilarimiz ko'rsatmalarni yaxshi bajarishdi.

- G'alaba bilan tabriklaymiz. Yil boshida kelgan futbolchilardan ko'nglingiz to'lyaptimi?

- Birga ish olib borayotganimiz uchun hammaga katta rahmat aytaman. Mavsum avvalida bir nechta yangi o'yinchilarni qo'shib oldik. Qani endi imkon bo'lsa-yu, Messini ham chaqirgan bo'lardik. Umuman olganda hamma futbolchilar yaxshi harakat qilyapti, bizda jamoaga ortiqcha o'yinchi yo'q.

- Alisher Odilovning zaxiraga olinishi muxlislar etiroziga sabab bo'lyapti.

- O'yin payti muxlislarning nima deb hayqirayotganini eshitmayman. Bor etiborimni o'yinga qrataman. Biz o'yin borishidan kelib chiqib futbolchi almashtiramiz, shunchaki almashtirish kerakligi uchun emas. Raqib bahsga moslashib olganidan keyin qanotni o'zgartirish payida bo'ldik. Shu bois ham Odilovni almashtirdik. Kim lozimni ko'rsak, o'sha maydonda harakat qiladi. Men familiyalarga etibor bermayman, o'yinchilarning harakatini kuzataman.

- Qaysi jamoalarni noqulay raqib sifatida ko'ryapsiz?

- Chempionat saviyasi juda ortgan va buni hammamiz tan olishimiz kerak. O'tgan yil ham Superliga kuchli o'tgandi. Masalan, besh yil oldingisi bilan solishtirsak, hozirgi futbolni o'ynash va g'alaba qozonish ancha qiyin.

Chempionlikka harakat qilayotgan 5-6ta klub bor. Iqtidorli yoshlar ham ko'paydi. Shu bois men raqiblarni oson yoki qiyinga ajratmayman. Bugungi raqibimiz ham kuchli edi, ammo uchta gol urib g'alabaga erishdik.

Hozir hamma himoyalanishni o'rganib oldi. Har bir jamoada 3-4 nafar yaxshi saviyadagi o'yinchi bor. Hatto turnir jadvalining quyi o'rinlarida borayotgan jamoalar bilan ham oson bo'lmayapti. Hali oldinda butun boshli ikkinchi davra turganini hisobga olsak, chempionatimiz oxirigacha qiziq kechadi deb o'ylayman.

Birinchi davra tugay deb qoldi, shunga qaramay falonchi chempion bo'ladi deb yaqqol ko'rsata olmayman. Hatto Superligadan tushib ketadigan jamoani ham aytish mushkul. "Dinamo" bilan ilk turdagi o'yinimizni yodga oling. Biz uyda 0:0 o'ynagandik va bu ham oson bo'lmagan.

- Umarali Rahmonaliev bilan Rustam Ashurmatov jamoaga keladi degan gaplar yuribdi. Bu qanchalik to'g'ri? Umuman yangi futbolchilarni o'zingiz tanlaysizmi yoki rahbariyat ham o'z fikrini aytadimi?

- To'g'risi, bu gapni endi birinchi marta eshitib turibman. Biz avvalo hozirgi futbolchilarni saqlab qolishni o'ylashimiz kerak. Agar klub rahbariyati mendan Rustam Ashurmatov kerakmi deb so'rasa, men albatta "Ha" deb javob beraman. Ammo bu - ertaga Rustam bizga kelib qo'shiladi degani emas. Uning o'z klubi bilan shartnomasi bor, qolaversa transfer summasi ham bor va bu transfer bir deganda amalga oshib qolmaydi. Shu bois mavjud tarkibni ushlab qolish ko'proq bizni o'ylantiradi. Qolaversa U-21 jamoamizda ham yoshlar bor, ularni ham asosiy jamoaga tortib sinab ko'ramiz.

- Mish-mishlarga qaraganda, Otabek Jo'raqo'ziev ikkinchi davrani "Navbahor"da boshlar ekan. Bu futbolchi ham sizning ro'yxatingizda bormi?

- Men bu haqda birinchi marta eshityapman. Aytdim-ku, mish-mishlar ko'p va biz bunga etibor bermaymiz. Sifatli o'yinchi hammaga kerak, shu jumladan bizga ham. Lekin rahbariyat menga mahalliy yoshlarni ko'proq o'ynatish vazifasini qo'ygan. Yana boyagi gapga qaytamiz. Agar Rustam Ashurmatovni olsak, unda o'zimizning o'yinchilar qaerda o'ynaydi? Zaxirada o'tiradimi? To'g'ri, kuchlilar maydonda o'ynaydi, raqobat bo'lishi kerak, bunga qarshiligim yo'q. Lekin har qanday transferni amalga oshirish hozirgi futbolda mushkul jarayon hisoblanadi. Kim o'ynashini esa men hal qilaman, boshqa hech kim emas.

Sergey Lushchan: "Men familiyaga etibor bermayman, o'yinchilarning harakatini kuzataman"