35 yoshli yarim himoyachi Tehron sharafini himoya qiluvchi “Istiqlol”ning tibbiy ko'rigidan muvaffaqiyatli o'tdi va klub bilan 500 ming AQSH dollariga teng 1,5 yillik shartnoma imzoladi.

Server Jeparov yangi klubida faol ishtirok etib, samarali natija ko'rsata olsa, mukofot puli ko'rinishidagi qo'shimcha bonuslarga ega bo'ladi.

Eron Pro Ligasi vakili “Istiqlol” 2015/16 yilgi mavsumda chempionatni 3-o'rinda tugatgan edi. Joriy mavsumda jamoa 16-turdan keyin 25 ochko bilan 16 ta jamoa orasida 5-pog'onani egallab turibdi.

2008 va 2011 yillarda Osiyoning eng yaxshi futbolchisi deb topilgan Server Jeparovning so'nggi klubi Toshkentning “Lokomotiv” jamoasi bo'lgandi. U 2016 yilgi mavsumda “temiryo'lchilar”ning barcha musobaqalarida 34 o'yinda maydonga tushib, 8 ta gol kiritdi va “Lokomotiv”ning tarixda ilk bor O'zbekiston chempioni bo'lishiga hamda mamlakat Kubogi sohibiga aylanishiga hissa qo'shdi.

Server Jeparov professional faoliyati davomida quyidagi klublarda to'p surgan:

“Navbahor” - 2000–2001
“Paxtakor” - 2001–2007
“Bunyodkor” - 2007–2010
“Seul” (Janubiy Koreya) - 2010 (ijara)
“Seul” (Janubiy Koreya) - 2011
“Ash-Shabob” (Saudiya Arabistoni) - 2011–2013
“Seongnam” (Janubiy Koreya) - 2013–2014
“Ulsan Xyondai” (Janubiy Koreya) - 2015
"Lokomotiv” Toshkent - 2016

Malumot uchun, Jeparov “Seul” klubi bilan Janubiy Koreya (2010) chempionligi va Kubogi (2010), “Ash-Shabob” (2012) bilan Saudiya Arabistoni chempionligini qo'lga kiritgan. Shuningdek, u Toshkentning uch klubi - “Paxtakor” (2002, 2003, 2004, 2005, 2006, 2007), “Bunyodkor” (2008, 2009) va “Lokomotiv” (2016) safida O'zbekiston chempioni bo'lishga erishgan.

O'zbekistonlik yarim himoyachi 2008 yilda O'zbekiston chempionati to'purari, 2008 va 2010 yillarda O'zbekistonning eng yaxshi futbolchisi bo'lgandi.

Server Jeparov Eronning “Istiqlol” klubi bilan 1,5 yillik shartnoma imzoladi