"O'yin ancha qiziqarli ruhda o'tdi, deb hisoblayman. Ikki jamoada ham etarlicha vaziyatlar bo'ldi. Gol urish nasib qilmadi. Birinchi bo'limda ustunlik jamoamiz tomonida edi. Agarda hisobni ochib olganimizda o'yin boshqacha kechishi hech gapmasdi. Ammo bu - futbol. Ikkinchi bo'lim umuman boshqa ritmda kechdi. Uchrashuvning dastlabki qismida futbolchilar ko'p energiya sarflashdi. Ikkinchi qismidagi o'yinni yana ko'rib chiqamiz",- deydi Server Jeparov.

- O'z vaqtida terma jamoada o'ynagansiz. Bugungi kunda Superligada Toshkentdan 4ta klub qatnashadi. Poytaxtda tomoshabinlar kam. Nima deb o'ylaysiz, viloyatlarga etiborni oshirgan yaxshi emasmi?

- Savolingiz yaxshi. Buning uchun etibor beradigan ko'p omillar bor. Infratuzilma va yana ko'plab jihatlarga qarash kerak. Stadionlar talabga javob berishi lozim. Masalan, "Qo'qon-1912" nima uchun Yaypanda o'ynayapti? Chunki stadion talab doirasida emas. Birinchi o'rinda yaxshi infratuzilma zarur. Superliganing talablari mavjud. Biz o'z vaqtida Nukusda to'p tepganmiz. Qanday maydonlarda o'ynaganmiz. Tomoshabop futbol uchun shunga yarasha chiroyli maydon kerak. Muxlislarga qulayliklar yaratilishi darkor. Deylik, "Bunyodkor" stadionining istalgan nuqtasida o'yinni kuzatish mumkin. Shunday bo'lsa, albatta muxlislar stadionlarga qaytadi.

- Jasur Jaloliddinov bugun qizil kartochka oldi. O'tgan o'yinda ham ko'p bahslashgandi...

- Jasur o'z oldiga katta maqsadlarni qo'ygan futbolchi. Uni tushunaman. Chunki o'z vaqtida men ham shunday futbolchi bo'lganman. O'yindan keyin biroz vaqt o'tib gaplashib olamiz. Futbol jamoaviy o'yin. Qizil kartochkani hakam bilan tortishgani uchun berdi deyishdi. Avvalroq kiyinish xonasida futbolchilarga hakam bilan ziddiyatga bormaslikni tushuntirgandik. Hakamlarni ko'rib chiqadigan komissiya bor. Futbolchilar birinchi o'rinda o'z ishini qilishi kerak. Hamma yosh futbolchilarga maslahatim shuki, birinchi navbatda o'z jamoangizni o'ylang.

Server Jeparov: "Futbolchilar hakam bilan tortishmasdan birinchi o'rinda o'z ishlarini qilishlari kerak"