Сиз билан биз айни дамда Россия яшил майдонларида ўтаётган XXI жаҳон чемпионатига гувоҳ бўлаяпмиз. Бу чемпионат шу қадар машҳурки, шу қадар жозибадорки, ўзига барчани ром эта олади. Қайси терма жамоа тарихда неча марта чемпион бўлгани, неча марта ютқазгани, ким билан ким клубдош эканлиги бу турнирда аҳамиятсиз, рақибми тамом, майдонда барчаси унутилади. Бу чемпионат шу қадар шафқатсизки, ким неча марта олтин тўп олгани, ким ўз қитъасида тенгсиз бўлгани, ким дунёнинг энг кучли футболчиси эканлигига қараб ўтирмайди. Терма жамоаси имкониятни бой бердими, ўша футболчига чиқиш эшиклари кўрсатилади.

Россия яшил майдонларида ўтадиган ЖЧ-2018га биз бутун мавсум давомида мухлислик қилган, ўйинларидан завқ олган ва хайратланган Муҳаммад Салаҳ келди. Гуруҳ босқичи якунига етди ва Салаҳ чемпионатни тарк этди, шафқатсиз чемпионат бизни унинг ўйинларидан завқ олишга маълум бир вақтгача маҳрум қилди.

ЖЧ-2018га амалдаги жаҳон чемпиони, Конфедерациялар кубоги ғолиби Германия терма жамоаси келди. Бу терма жамоада биз билган ва таниган, мухлислик қилган Мюллер, Кросс, Ўзил каби машҳурлар келди. Гуруҳ босқичининг сўнги ўйинида қитъадошларимиз Жанубий Корея Германиянинг амалдаги чемпион эканлигига қараб ўтирмади, ўз ўйинини кўрсатди ва натижага кўра Германия мундиални тарк этди, биз билган машҳурлар ҳам.

Мундиалга Аргентина терма жамоаси таркибида Месси, Агуэро, Ди Мария каби футболни санъат даражасида ижро этувчилар келди. Гуруҳ босқичидан чиқишди, нимчорак финалда уларнинг қаршисида Франция терма жамоаси чиқди ва уларни шу босқичдаёқ тўхтатди. Эни биз кутамиз, кутишга мажбурмиз, Мессининг ўйинларидан завқ олишимиз яна озроқ кутамиз. ЖЧ-2018нинг қолган қисмини бешта "Олтин тўп" соҳиби Мессисиз кўришга мажбурмиз.

Россия яшил майдонларида ўтаётган мундиалга Европа чемпиони Португалия келди. Бу терма жамоа таркибида "Реал Мадрид" сафида кетма-кет 3 марта ЕЧЛни ютган Роналду келди. Португалия гуруҳдан чиқди, нимчорак финалда Уругвайга рўбаро келди ва енгилди. Энди мундиалда Роналду ҳам йўқ, юқорида айтганимиздек унинг ўйинларини кўриш учун яна кутишга мажбурмиз. Ҳа айтганча, Месси-Роналду қарама-қаршилиги шу мундиалда ҳам давом этди, Месси йўқ жойда менга нима бор деб, ортидан Роналду ҳам кетди, улар мундиални бир кунда тарк этишди.

Шафқатсиз чемпионатни яна кўплаб номлар тарк этди, биз уларни снаб ўтирмадик, чунки шундоқ ҳам тушуниб, кўриб-кузатиб турибсиз барчасини. Ҳар доим жаҳон чемпионатида биз турнир бир қатор янги номларни, кашфиётларни аниқлайди. Шулардан бири ҳозирданоқ маълум, бу Франция терма жамоаси таркибида ҳаракат қилаётган Бенжамин Павар. Шу футболчини сиз танирмидингиз? Шахсан мен эшитмаган эканман ёки эслай олмадим.

Ҳа, мундиални буюк футболчилар аста-секин тарк этмоқда. Бу билан биз бу чемпионат жозибасини йўқотди дейишдан йироқмиз. Нега деганда бу жаҳон чемпионати, бу ерда ўтказиладиган учрашувларнинг аҳамияти шу қадар юқорики, қанча таърифласак, қанча гапирсак оз. Сиз мундиални кўришда давом этинг, айни дамда чемпионат энг қизғин палласида!

Бекзод Толибов

Шафқатсиз мундиал