Qizilqum - Navbahor o'yini haqida:

- Jadvalda yuqorida joylashgan, to'g'ridan-to'g'ri raqobatchilar to'qnashuvi. Qizilqum mag'lubiyatsiz odimlamoqda, Navbahorda esa barqarorlik yo'qolgan. Lekin yaqinda bu jamoalar kubokda duch kelganida Babayan jamoasi ishonchli tarzda yutgani va o'shanda raqibni yaxshi o'rganib, zararsizlantira olganini guvohiga aylangandik. Bu gal ham Navbahorda imkoniyat yuqoriroq, degan fikrdaman. Birinchidan, Qizilqum garchi mag'lubiyatsiz davom etayotgan bo'lsada, o'yin taraflama yuqori darajada emas. Ikkinchidan, Qizilqum startda nisbatan osonroq raqiblar bilan to'qnashdi va unda futbolchilar mahorati katta sahnaga chiqdi. Aytmoqchi bo'lganim, Qizilqum yutishi kerak bo'lgan o'yinlarni yutdi. Endi yutishi qiyin bo'lgan uchrashuvlar arafasida. Bu kategoriyadagi raqiblar bilan jamoa ancha terlaydi. Uchinchidan, teng kuchli jamoalar to'qnashganda nafaqat futbolchilar mahorati, balki o'yinga tanlanadigan taktikaga ko'p narsa bog'liq. Babayan jamoasi o'yini juda mazmunli bo'lmasada, raqibga muammo tug'dira oladi. Kubokda isbotlandi. Shuningdek, yakka ijrochilar mahorati bobida Navbahor ancha ustunroq. Bu shunchaki meni qarashim va fikrlarim. Balki Qizilqum fikrlarim noto'g'riligini isbotlar, ko'ramiz.

Lokomotiv - Surxon o'yini haqida:

- Jadvalda autsayder maqomida turgan jamoalar ishtirokidagi qizg'in o'tishi kutilayotgan duel. Har taraflama o'zgargan jamoalar. Garchi ikkala jamoa hozircha pastda bo'lsada, bu o'yin darajasi ham shunga monand o'tadi, degani emas. Klopp taqlidchisi sifatida shov-shuv ko'targani va yoshligini inobatga olmasa, Korostichenko murabbiy sifatidagi imzosi (~~muxlislardan tashqari~~) orqali hali hech kimni hayratga solgani yo'q, menimcha. Surxonning ispaniyalik koachi Lopez esa garchi natija taraflama jamoada yangilik qilmagan bo'lsada, o'yin jihatidan maqtovlar qurshovida. Avvalgi tep-yugur, mazmunsiz va maqsadsiz, o'yinni boshlaganidan cho'zish uchun o'ynaydigan jamoadan asar ham qolmagan. Futbol o'ynashga intilayotgan, tarkibi g'aribroq bo'lsada maydonda buni sezdirmayotgani, bu albatta murabbiy imzosi, menimcha. Surxon o'yinida jonlanish, avval kuzatilmagan yoqimli o'yin uslubi shakllanayotganini inkor etish qiyin. Natija esa o'zgarishi vaqt masalasi. Kubokda natija taraflama jonlanish kuzatilgani chempionatda ham bu palla kelayotganidan darak. Demak aynan bugungi o'yin o'sha pallaga to'g'ri keladimi yoki yo'q, buni bir necha soatlardan keyin ko'ramiz. Tarkib jihatdan Loko ustun, lekin jamoaning o'yin kartinasi va murabbiy faktori Surxonni ilk g'alabaga etaklaydi, degan fikrdaman.

So'g'diyona - Metallurg o'yini haqida:

- Ikki ikkinchi raqam bilan o'ynashni xushlaydigan jamoalar. Aynan ikkinchi raqam bilan o'ynaydigan o'yinlarda ular o'z ustun taraflarini ishga solish bo'yicha kuchliroq jamoalar. Bu jamoalar, ayniqsa So'g'diyona ishtirokidagi o'yinlarda kichik epizodlar o'yin taqdirini hal qiladi. Metallurg bilan Jizzaxdagi o'yinda So'g'diyona ko'proq tashabbusni o'z qo'liga olishga majbur. Raqib balki kuchsizdek ko'rinar, lekin uslub jihatdan noqulayligi bor. Metallurg esa avvalo gol o'tkazib yubormaslik vazifasida o'ynaydi va tabiiyki So'g'diyonaga qarshi hujum yoki standart vaziyatlarini yaratishga tish tirnog'i bilan qarshilik qiladi. Va aynan o'zi shu imkoniyatni poylaydi. Bu uchrashuvda o'yin taqdirini hal qilishi mumkin bo'lgan epizodlar kam bo'ladi, nazarimda. Agarda bunday epizodlar kuzatilmasa, tabiiyki durang bo'lishi mumkin. Qiyin, kurashlarga boy o'yin. Chunki tavakkal qilishni yoqtirmaydigan, minimal ochkoni ham qadrlaydigan ikki jamoa.

SHAHBOZ BEG'AMOV

Shahboz Beg'amovdan bugungi o'yinlarga prevyu