30 yoshli markaziy himoyachimiz BAA chempionatining ikkinchi qismida endi sharjaliklar tarkibida harakat qiladi.

Italiyalik mashhur sobiq darvozabon Valter Dzenga bosh murabbiyligidagi “Al-Shaab” Mullajonovning hisob bo'yicha to'rtinchi xorijiy klubidir. U bungacha Qatarning “Al-Ahli” (2010/2011ning 2-yarmi, 2011/2012), Saudiya Arabistonining “Al-Nasr” (2012/2013ning 1-yarmi) hamda Xitoyning “Lyaonin Vuvin” (2013) jamoalarida o'ynagan.

- Men, o'ylab qarasam, oxirgi bor maydonga 25 sentyabr kuni tushgan ekanman, - deydi yangi legionerimiz. – Bu voqeaga uch oydan ortiq vaqt bo'libdi. Ikkinchi davrada, malum sabablarga ko'ra, men “Lokomotiv”da o'yin amaliyotisiz qolib ketdim. Yangi mavsum boshlanishiga ham hali yana ikki oy bor. Orada ushbu katta bo'shliq paydo bo'lgani uchun ham men, garchi “Al-Shaab” ligada qolish uchun kurashayotgan autsayderlardan bo'lsa-da, arablar taklifiga rozilik bildirdim. Menga ayni damda o'yin amaliyoti hamda musobaqalashuv jarayoni judayam zarur edi. Etibor bersangiz, meni, garchi “temiryo'lchilar” safida mavsum so'ngida aksariyat vaqtimni zaxira o'rindig'ida o'tkazgan bo'lsam-da, milliy terma jamoamizga muntazam ravishda chaqiraverishdi.

Futbolchining agenti Sanat Sharipov ham ayni sharoitda Mullajonovga rasmiy uchrashuvlar ayni muddaoligini takidladi:

- Shavkat Mullajonov katta tajribaga ega himoyachi. U mudofaaning markazida ham, o'ng qanotda ham bemalol to'p sura oladi. O'zbekiston terma jamoasi ro'yxatidan hamisha o'rin oluvchi futbolchilardan. “Al-Shaab”ni oldinda kuchlilar safida jon saqlab qolish uchun kechadigan ayovsiz kurash kutib turibdi. Aynan shunday bahslarda Shavkat bu erda katta sinovdan o'tadi. Bu holat u uchun qo'shimcha imkoniyat: agar shu yarim yil mobaynida u o'zini yaxshi tarafdan ko'rsata olsa, kelgusi mavsumni himoyachimiz balandroq darajadagi boshqa klubda boshlashi mumkin. Bu esa Mullajonov o'z-o'zidan O'zbekiston milliy terma jamoasi safidagi muqim o'rnini yaqin orada yana o'zida ushlab qolishi ehtimoli kattalashadi degani. Niyat qilamizki, nima bo'lganda ham, bu o'zgarish terma jamoamiz manfaatiga xizmat qiladi.

Muxlislar yaxshi bilishadi, 2013/2014 yillardagi mavsumning ikkinchi yarmida “Al-Shaab” sharafini hamyurtimiz Oybek Qilichev ham himoya qilgandi.

Shavkat Mullajonov: “Al-Shaab”ning taklifiga rozilik bildirdim”