- O'yin haqida fikringiz?

- "Nasaf" o'z nomiga va tarixiga ega jamoalardan biri. Kuchli futbol namoyish etishini hamma biladi. Shundan kelib chiqib biz bu jamoaga qarshi ochiq o'yin namoyish eta olmasdik. Shu bois asosiy etiborni himoyaga qaratgan holda qarshi hujumda o'z kuchimizni sinab ko'rishni maqsad qildik. O'yin og'ir kechishini bilardik va shunday bo'ldi ham.

- Bugun jamoangiz g'alaba uchun maydonga tushdimi yoki yutqazib qo'ymaslik uchunmi?

- Bugun g'alabani ko'zlab maydonga tushgandik. Bilasiz, futbolda hamma yutuq haqida o'ylaydi, o'yinni o'tkazib olsak bo'ldi deb o'ylaydigan jamoa bo'lmasa kerak. Biz namanganlik muxlislarni xursand qilish uchun o'ynayapmiz. Ko'p uchrashuvlarda ishqibozlarni ranjitib qo'ydik, endi ularning ishonchini yana qaytarishga harakat qilyapmiz. Xudo xohlasa, keyingi uchrashuvlarda ham bor kuchni berib o'ynaymiz.

- "Nasaf" tarkibida qaysi futbolchining harakatlari ko'proq yoqdi?

- "Nasaf" shunday jamoaki hech qachon bitta yo ikkita futbolchiga suyanib o'ynamaydi. Doim jamoaviy o'yin tuzishga harakat qiladi. Shu bois alohida kimnidir ajratib ko'rsata olmayman. Menga Ro'ziqul Berdievning ish yuritish uslubi doim yoqqan, u kishining metodikasini bemalol o'rgansa bo'ladi.

- 2022 yildan beri "Nasaf" "Navbahor"ning chempion bo'lishiga yoki kubokni qo'lga kiritishiga to'sqinlik qilib kelmoqda. Bugungi durang qaysidir manoda revansh olindi desa bo'ladi. Bu borada fikringiz?

- Agar shunday bo'lgan bo'lsa, buni qaytar dunyo deydilar. Doim ham "Nasaf" yutavermaydi-ku. Biz "Nasaf"ga qarshi oldingi natijalarni o'ylamasdan o'z o'yinimizni namoyish etishga harakat qildik. Bunday jamoalar bilan to'qnash kelib siz o'z darajangizni bilib olasiz. Chunki "Nasaf" "Al Hilol", "Al Ahli" kabi grand jamoalar bilan tengma-teng o'ynadi. Shu orqali futbolchilar katta futbolga qadam tashlaydi, shu orqali motivaciya uyg'onadi.

- Bugungi uchrashuvda ishtiyoq umuman boshqacha bo'ldi. Siz o'yindan oldin futbolchilarga nima dedingiz?

- Qo'qondagi o'yinimizda ham ishtiyoq yuqori bo'lgandi, faqat xatolar kuzatildi. "Bunyodkor" bilan bahsda ham xatolar davom etdi. Bugun esa iloji boricha xato qilmaslikka harakat qildik. Qolaversa "Nasaf"ga qarshi futbolchilarni alohida ruhlantirish shart emas.

- Chempionlik poygasida qaysi jamoaning imkoniyatini yuqori baholaysiz?

- "Neftchi"ning taqvimi unchalik murakkab emas. "Nasaf"da taqvim biroz og'irroq: Toshkentda "Paxtakor" bilan o'ynaydi, o'z uyida "Dinamo"ni qabul qiladi. Futbolda chempionlikka erishish emas, balki uni saqlab qolish qiyin deb o'ylayman.

- Bugun Durbek Umaralievni murabbiylar shtabida ko'rdik.

- Durbek Umaraliev yaxshi mutaxassis, futbolchilarning jismoniy holati bo'yicha yaxshi ish olib boradi. Shu bois ham murabbiylar shtabiga chaqirishga qaror qildik.

Sherzod Jo'raev: "Nasaf"dek jamoaga qarshi futbolchilarni alohida ruhlantirish shart emas"