- O'yin haqida

- "Lokomotiv"ni haqli g'alaba bilan tabriklayman. Raqibni Pro liganing kuchli jamoalaridan biri deb bilaman. Yigitlar bor kuchini ishga solishdi, ammo tajriba evaziga "Lokomotiv" darvozamizga to'rtta gol urdi.

- Andijonlik himoyachilar o'z jarima maydonida raqibiga erkin o'yin namoyish etishga yo'l qo'yib berishdi, buni qanday izohlaysiz?

- To'g'ri, savolingiz o'rinli. Himoyachilarimizda bugungi bahsda chalkashlik yuzaga keldi, raqib o'yinchilarini yopishga ulgurmadi. Chunki raqib dastlabki daqiqalardan tezkor hujumlar tashkillashtirdi. Yigitlar hali yosh, ularning mahorati o'yindan-o'yinga oshadi, degan umiddaman. O'yindagi xatolarimizni ko'rib chiqamiz va bartaraf etish ustida ishlaymiz.

- Bu yil Pro ligadan Superligaga qaysi jamoalar yo'l oladi deb o'ylaysiz?

- Birinchi favoritlardan biri - "Lokomotiv". Shuningdek, "Dinamo"ni etirof etish kerak. Bizga bu ligada raqobat olib borish qiyin, buni tushunib etyapmiz. Lekin to'xtamaymiz. Futbol shunaqa narsaki, unda mo'jizalar bo'lib turadi.

- Yaqinda jamoa Ispaniyadagi xalqaro musobaqada qatnasharkan. Tarkibdagi nechta futbolchi ushbu turnirda ishtirok etadi?

- Tarkibda 25 nafar futbolchi bo'lsa, shundan 16 tasi 2005-2006 yillarda tug'ilgan. Ana shu yoshlar Barselonadagi nufuzli musobaqada qatnashadi. Bugun ham asosiy tarkibda besh nafar yosh o'yinchi maydonga tushdi. Ikkinchi bo'limda ham yana beshta o'yinchimizni almashtirdik. Yoshlarga ko'proq imkon berishga harakat qilyapmiz.

Shohruh Ishanov: "Futbol shunaqa narsaki, unda mo'jizalar bo'lib turadi"