Xabaringiz bo'lsa kerak, payshanba kuni Oq bo'rilar o'z maydonida chempionatning 8-turidan o'rin olgan Mashalga qarshi bahsda raqibiga imkoniyatni boy berib qo'ydi.

Shu bois bugun jamoaning G'uzor shahridagi qarorgohida navbatdan tashqari yig'ilishi bo'lib o'tdi. Uni klub vice-prezidenti Viktor Aleshnikovning o'zi olib bordi. Jamoaning so'nggi paytlarda qimmatli ochkolarni boy berayotgani rahbariyat va muxlislarni tashvishga solib kelayotgandi. Shuning uchun kun tartibidan o'rin olgan asosiy masala - murabbiylar shtabining faoliyatini ko'rib chiqish edi. Yakunda bosh murabbiy Asror Aliqulov rahbariyat tomonidan istefoga chiqarildi. Shuningdek unga yaqindan yordam berib kelgan murabbiylar - Botir Qodirqulov bilan Akmal Saidqulovga ham chiqish eshiklari ko'rsatildi. O'z navbatida klub rahbariyati ushbu murabbiylarning Sho'rtan rivoji uchun qilgan mexnatlariga minnatdorchilik bildirib do'stona ravishda xayrlashdi.

Endilikda jamoani vaqtinchalik Bahodir Shoymardonov boshqarib turadigan bo'ldi. Unga darvozabonlar murabbiyi Erkin Mirzaev ko'maklashadi. Shoymardonov bunga qadar Sho'rtanda texnik-direktor lavozimida ishlab kelayotgandi. Dushanba kuni g'uzorliklarni Farg'onada Istiqlolga qarshi o'yinga Shoymardonov olib tushadi. Klub rahbariyati bosh murabbiylikka hozirda bir qator nomzodlarni ko'rib chiqmoqda. Yaqin orada shulardan biri bilan rasmiy tarzda muzokara o'tkazilib, yangi bosh murabbiyni keng ommaga tanishtiradi.

"Sho'rtan" bosh murabbiyi Asror Aliqulov istefoga chiqarildi