O'yin haqida

Ikki turdan buyon shogirdlarimning o'yinidan qoniqayotgandim, biroq natija havas qilarli emasdi. Bugungi o'yinda ular ko'rsatmalarni to'laqonli amalga oshirishdi. Xatolar ham bo'ldi. Mehnat qilish zamirida albatta, xatolar bo'ladi. Yigitlarga, shuningdek, muxlislarga minnatdorichiligimni bildirib qolaman. Rahbarlar hamda homiylarni ham chin qalbimdan tabriklayman. "Lokomotiv" jamoasiga kelgusi o'yinlarda omad tilayman.

- Ikki bo'limni solishtiradigan bo'lsak, "Bunyodkor" birinchi bo'limda uzun paslar bilan o'ynashga harakat qildi. Ikkinchi bo'limga kelibgina, jamoa o'z uslubida harakat qila boshladi. Bu o'yin uchun tayyorlangan rejamidi?

- Yuqorida takidlaganimday, yigitlarda ishtiyoq yuqori. Tarkibimiz yosh, akademiya tarbiyalanuvchilari sanaladi. Shu bois, bunday holatlar o'yinda yuzaga kelishi tabiiy. Tanaffusda kerakli ko'rsatmalarni berdik. Ikkinchi bo'limda esa o'z uslubimizda o'ynashni boshladik. Natija yaxshi bo'ldi. Biroq futbol 90 daqiqa davom etadi. Xotirjamlikka berilish oqibatida gol o'tkazib yubordik. Bu ham bizga saboq bo'ladi. Kelgusida o'yinlarda oxirigacha bo'shashmasdan to'p tepishga harakat qilamiz. O'yindan o'yinga rivojlanamiz, deya umid qilaman.

- Maydon holati haqida gapirsangiz.

- Men o'yindan oldin ham maydon holati yaxshiligini takidlagandim. Bundan yomonroq maydonlarda ham o'yinlar o'tkazildi. Maydon borasida etirozim yo'q.

- Usmonali Ismonaliev "Andijon"da, yani standartlar va uzun paslar orqali o'ynaydigan jamoada to'p tepgan. "Bunyodkor" esa boshqa uslubdagi jamoa hisoblanadi. Uni jamoaga jalb qilinishini qanchalik to'g'ri deb o'ylaysiz?

- Yil so'ngida jamoamizni ko'plab o'yinchilar tark etdi. Uning to'purarlik mahoratini inobatga olib, jamoaga olib keldik. Ismonaliev hozirda tiklanish jarayonida. Uning tez orada formaga qaytishiga umid qilamiz.

- Ibrohim Gbadamosi nega Turkiya safariga olib ketilmadi?

- Uni avval ham aytganman, viza masalasi bilan bog'liq muammolar sababli uni qoldirishga majbur bo'ldik. U bilan domiy aloqada bo'lib turdik.

Shuhrat Maqsudov: "Bunyodkor"dan ham yomon maydonda o'ynashdi. Ammo..."