"Barcha O'zbekiston ahlini yaqinlashayotgan Navro'z bayrami bilan chin qalbimdan tabriklayman. "Metallurg" jamoasini ham g'alaba bilan tabriklayman. O'yin haqida fikr bildiradigan bo'lsam, bu endi futbol. Unda kimdir yutadi yoki yutqazadi. Omadi kelgan jamoa g'alaba qozonadi. Biz o'zimiz yaratgan vaziyatlardan foydalana olmadik, ayniqsa ikkinchi bo'limda. Darvozamizdan kutilmaganda to'p o'tkazib yubordik. Shogirdlarimdan minnatdorman. Ular oxirigacha kurashishdi ",- deydi murabbiy.

- Jamoani yangi mavsumga Marat Miftaxutdinov tayyorladi. Chempionat starti arafasida esa siz bosh murabbiyi etib tayinlandingiz. Bu siz uchun qanchalik qulay yoki noqulayliklar tug'dirdi?
- Bu haqda avvalgi matbuot anjumanlarida ham javob berib o'tgandim. Jamoaga yangi kelgan bo'lganimda boshqa gap edi. Shu klubda to'rt yildan beri faoliyat olib bormoqdaman. Bu erda hech qanday o'zgarish bo'lgani yo'q. Jamoaning o'yin uslubi saqlanib qolingan.

- "Metallurg"da murabbiylar shtabi o'zgardi. O'yin sxemasida ham o'zgarishlar kuzatildi. Bu sizga qay darajada jumboq bo'ldi?
- Murabbiyning o'zgarishi klubning ichki ishi hisoblanadi. O'yinni shunday o'tishini kutgan edik. Omad raqibga kulib boqdi.

- Lutfulla To'raevning almashtirilishi uning jismoniy holati bilan bog'liqmi?
- Lutfulla To'raev terma jamoa yig'inidan jarohat bilan qaytgandi. Buning asorati baribir o'z so'zini aytmoqda. Jarohat kuchayib ketmasligi uchun almashtirdik. Hakamlar haqida umuman gapirmayman. Ularni nazorat qiladigan qo'mita bor. Menga sariq kartochka berilgan vaziyatda shogirdimga etiroz bildirgandim. Ilgiz Tantashevni hurmat qilaman. Hakamlar ham inson, ularda ham xato bo'lib turadi.

Shuhrat Maqsudov: "Lutfulla To'raev terma jamoa yig'inidan jarohat bilan qaytgandi"