Qanday o'yin bo'lganiga hamma guvoh bo'ldi. Avvalgi turdagi alamli mag'lubiyatdan keyin, futbolchilarning ruhiy holatini yaxshilashga harakat qildik. O'ylashimcha, bugun futbolchilarimiz yaxshi o'yin ko'rsatishdi. Bugun omadimiz kelmadi. Futbolda omad muhim ahamiyat kasb etadi. Oldingi turda bo'lgani kabi vaziyatlardan foydalana olmadik.

Shogirdlarimga bugungi o'yin uchun katta rahmat aytaman. Ular kiyinish xonasida tushkunlikka tushib qolishdi, ularga rahmat aytib kichik tanaffusga kuzatib qo'ydik. Bugungi kunda kim kuchli bo'lsa, o'sha maydonga tushadi", - deydi Shuhrat Maqsudov.

- Odiljon Abdurahmonovning bir nechta o'yinlardan beri zaxirada qolayotganini sababi nimada? Vaholanki hujumlarni boshlashdi, gavda bilan o'ynashda qirg'izistonlik futbolchi yaxshi harakat qilayotgandi...
- Jarohati yo'q. Bugungi kunda kim kuchli bo'lsa o'sha futbolchi maydonga tushadi.

- Shahboz Erkinovning holati shunchalik yomonmi? Mirjahon Mirahmadovning o'yini muvaffaqiyatsiz chiqqaniga qaramasdan 90 daqiqa o'ynatdingiz...
- Sizga shunday ko'rinayotgan bo'lishi mumkin. Mirjahon Marahmadovning o'yinidan mamnunman, shuning uchun unga ishonch bildirdim. Bu boshqa futbolchilarga ishonmayman deganim emas, vaqti kelib, hammaga imkoniyat beriladi. Mashg'ulotlarda barcha futbolchilar o'zlarini yaxshi ko'rsatmoqda.

- Jamoa uchta pas bilan hujumga yaxshi o'tayotganini ko'rdik. Buni ko'proq qo'llashni imkoni yo'qmi? Hujumlarni keskinlashishida bu samara berayotgandek...
- O'yindan oldin futbolchilarga vazifalar beriladi. Gapirish boshqa, o'yindagi vaziyatlar tashqarida aytilgan gaplarga to'g'ri kelmay qolishi mumkin. Bu o'yindan kelib chiqib amalga oshiriladi. Qolaversa raqib ham qarab turmaydi.

- Jamoangiz feyr pleyga amal qilmayapti, bu sizning ko'rsatmangizmi yoki futbolchilarning o'zlari shuni xohlashyaptimi?
- Menimcha, bugungi kunda feyr-pleyga eng ko'p amal qiladigan jamoa "Bunyodkor" bo'ladi. Bitta o'sha birinchi bo'limda Farrux Ikromov o'yinni to'xtatmaganini inobatga olsak, boshqa bunday holat kuzatilmadi.

- "Bunyodkor"ning zaxira o'rindig'i katta emasligi bilinyapti. Yozgi transferlar oynasida yangi futbolchilar olinadimi?
- Mavsum boshida boshqa jamoalarga singari yangi futbolchilarni olishda tanlov katta bo'lmadi. Yaxshigina homiyga ega bo'lganimizda transfer oynasi yopilgandi. Birinchi davrani yakunlab olsak, tarkibga yaxshi futbolchilarni olish niyatimiz bor. Shu jumladan, yoshlar jamoasidan ham.

- Jamoaning durang natija qayd etganida "Navbahor"ning ko'rsatgan o'yini ham sabab bo'ldimi?
- "Navbahor"ni "Neftchi"da ishlab yurgan paytimdan juda hurmat qilaman. Namanganda futbolni juda sevishadi. "Bunyodkor" har bir o'yinga raqibni hurmat qilgan holda tushadi. Jumladan, "Navbahor"ni ham. Lekin bugungi durang biz uchun mag'lubiyatga teng bo'ldi.

Shuhrat Maqsudov: "Mag'lubiyatga teng durang bo'ldi"