Kecha o'tkazilgan "Lokomotiv" - AGMK o'rtoqlik uchrashuvida Shuhrat Muhammadiev bir yildan ziyod tanaffusdan so'ng maydonga qaytish bilan birga o'zi uchun yangi chap qanot himoyasida to'p tepdi. Klubimiz matbuot xizmatiga bergan intervyusida Muhammadiev dastlabki taassurotlar haqida to'xtaldi.

- Bir yildan sal ko'proq vaqt o'tib yana maydonga qaytdingiz.

- Futbol o'ynashim o'zim kutgandan ham cho'zilib ketdi. Lekin asosiysi yana yashil maydonga qaytdim va bundan juda xursandman. Kecha AGMK bilan o'rtoqlik uchrashuvida bir bo'lim harakat qildim. To'g'risi, ancha payt o'ynamaganim uchun hayajon sezildi.

- Bu o'yinda bosh murabbiy sizni chap qanot himoyasida sinab ko'rdi.

- Ha, shunday. Endi bu chiziqqa ko'nikmaganim uchun bazi vaziyatlarda pozicion xato qildim. Lekin baribir futbolchi murabbiy aytgan joyda o'ynab o'zini ko'rsatishga harakat qiladi. Mashg'ulotlarda ham chap qanot himoyasida sinab ko'rishyapti. Tez orada o'ynab ketaman deb umid qilaman.

- Jarohatdan qutilib safga qaytish ancha cho'zilib ketgandek?

- O'tgan yil may oyida jarohat olgan bo'lsam, kuzga borib maydonga qaytishimni aytishgandi. Biroq ikki bor operaciya stoliga yotishga majbur bo'ldim. Birinchi operaciyam yaxshi o'tmagan ekan, ikkinchi bor yana operaciya qildirishga to'g'ri keldi.

- Rasmiy o'yinlarda ham chap qanotda o'ynashga to'g'ri kelsa bu siz uchun qiyin bo'ladimi?

- Albatta, oson bo'lmaydi. Chunki bungacha to'rt yil "Mashal"da va yana to'rt yil "Nasaf"da faqat o'ng qanot himoyasida to'p tepganman. "Lokomotiv"ga kelganimdan beri ham o'ng qanotda o'ynab kelayotgandim. Lekin baribir bosh murabbiyimiz ko'rsatmasiga amal qilishim kerak. Chunki maydonda futbolchi o'ynaydigan joyni murabbiy belgilab beradi.

Shuhrat Muhammadiev: "Yana maydonga qaytganimdan xursandman"