Tayyorgarlik qanday ketayotganini bilish maqsadida "Olimpik" va U-23 terma jamoamiz posboni Shukron Yo'ldoshev bilan suhbatlashdik.

- Shukron, 2022 yilgi mavsum qanday o'tdi? O'zingizdan ko'nglingiz to'ldimi?

- Ortda qolgan mavsumda ijobiy va salbiy lahzalarni boshdan o'tkazdik. Yil juda qiyin o'tdi, desa ham bo'ladi. Shunga qaramay, hech narsadan nolimayman. Qanaqa bo'lmasin, hayotimizda ro'y bergan voqealar allaqachon tarixga aylandi, endi bor etiborni yangi mavsumga qaratish kerak. Shuningdek, o'zimni ko'rsatishim uchun imkoniyat berayotgan murabbiylarimizga katta minnatdorchilik bildiraman.

- Fujayrada kayfiyat qanaqa?

- Jamoamizda do'stona va samimiy muhit shakllanganini bilasiz. Hamma ishlayapti. Yaqinlashayotgan 2ta o'rtoqlik o'yinida zaif tomonlarimizni ko'rib olishimiz, shu orqali keyingi o'yinlarga yaxshiroq tayyorlanishimiz kerak. Bunaqa bahslar shu jihati bilan juda muhim.

- Darvozabonlar bilan kim ishlayapti?

- Biz bilan haliyam tajribali mutaxassis Anvar Rashidov shug'ullanyaptilar.

- Ko'pincha futbol o'ynolmaydigan bolalar darvozaga qo'yiladi. Sizda ham shunaqa bo'lganmi?

- Yo'q. Avvalo, dadam ham darvozabon ekanliklarini aytishim kerak. Ular "Inter sport 40+" jamoasida o'ynaydilar. Bilasiz, ko'plab futbol yulduzlari faoliyatini yakunlaganidan keyin faxriylar turnirlarida qatnashib yuradi. Men bolaligimda shunaqa o'yinlardan birini tomosha qilgan edim. Otam 5 penaltidan 3tasini bartaraf qilganlar. O'sha lahzada professional darvozabon bo'lish istagi paydo bo'lgan. Otalar har doim o'z farzandlari uchun qahramon bo'lishadi...

- "Olimpik"dagi barcha futbolchilarga hozir yaxshi takliflar bor. Shukron Yo'ldoshev 2023 yil jamoada qoladimi?

- Yo'q, men "Olimpik"da qolishga qaror qilganlardan biriman.

- Shukron, suhbat uchun rahmat! 2023 yilda katta omad tilaymiz.

- Taklif uchun rahmat! Men ham fursatdan foydalanib, barcha jamoalarimizga yangi mavsumga yaxshi, eng muhimi, jarohatlarsiz tayyorlanishni tilayman.

Faxriddin Ro'ziev suhbatlashdi

Shukron Yo'ldoshev nega "darvoza"ni tanlagan?