U nemis futboli uchun borini berdi. Har doim maydondagi eng mehnatkash futbolchi hisoblanardi. "Basti" terma jamoa va klub miqyosida bir futbolchi erishishi mumkin bo'lgan barcha narsaga erishdi. Futbolga ixlosmand nemislar uni "Fußballgott" laqabi bilan atashadi. Ushbu terminni tilimizga bevosita tarjima qilsak, "futbol dahosi" deganidir.
Xatto, nemis futboli qiroli - ham futbolchi, ham murabbiy tariqasida mundialni yutgan birinchi inson Frans Bekkenbauerni ham "Kayzer Frans" ("Qirol Frans") deb ataganlar. Bastini esa...

Terma jamoa bilan mundiallarda ikki bor bronza, 2014 yil esa oltin medallarga ega chiqqan. "Bavariya" bilan ichki chempionatda chempion bo'laverganidan zerikib ketgan, jamoasi favorit deb hisoblangan chempionlar ligasi finallarida mag'lub bo'lsada, harakatdan to'xtamay 2013 yil bu baxtni principial raqiblariga qarshi bahsdagina totib ko'rdi.

Basti 2015 yil Manchester tomon yo'l oldi. Balki, keyinchalik o'zining eng katta xatosi sifatida "mankunian"ga aylangan kunini eslar. Zero, Joze Mourinyu uchun nom, unvon, salohiyat muhim emas. Unga kimningdir yuzi yoqmasa ham, jamoasida ko'rishni istamaydi. Ishonmasangiz, Kasilyas va Salahdan so'rab ko'ring. Nima bo'lganda ham Manchesterdagi voqealar Bastining buyukligiga zarracha tasir ko'rsatolmaydi.

2016 yilda terma jamoadagi faoliyatini yakunlab, o'zi Filip Lamdan qabul qilib olgan sardorlik bog'ichini Manuel Noyerga topshirgach, 2017 yil 21 martda okean ortiga yo'l oldi. Bu uning ko'hna qitadagi missiyasi yakunlanganidan darak edi.

Bugun bazilar Bastianning qaerdaligini-da unutgan. U hozir MLSda "Chikago Fayr" sharafini himoya qilmoqda. Balki, vaqti kelganda murabbiy sifatida Evropaga qaytib, yana qitani bo'ysindirar. Yillar o'tib, bu savolga ham javob topamiz.

Fahriddin Ro'ziev

Shvaynshtayger hozir qaerda?