Shunday qilib parda tushirildi, spektakl tugadi. Rossiyada o'tkazilgan navbatdagi jahon chempionati musobaqasi o'z yakuniga etdi. OFK prezidenti Shayx Salmon bin Ibrohim Al Xalifa ushbu mundial nihoyatda qiziq o'tganini takidlab, endi hammaning etibori Qatarda bo'ladigan 2022 yilgi jahon chempionatiga qaratilishini aytdi.

Shayx Salmon JCHni o'tkazgan Rossiya hukumati rahbariga, tashkiliy qo'mita azolariga va barcha futbol kishilariga chuqur minnatdorchilik bildirdi: "Rossiya musobaqani juda yaxshi o'tkazdi, men hammaga rahmat aytaman. Endi biz bor etiborni to'rt yildan keyin bo'ladigan Qatardagi jahon chempionatiga qaratamiz. O'ylaymanki, Qatardagi mundial ham yuqori saviyada tashkil etiladi. Biz keyingi mundialni yanada yaxshi o'tkazish uchun bor kuchni ishga solamiz, buning uchun katta reja ishlab chiqamiz".

"Osiyo bungacha JCH-2002ga mezbonlik qilgandi, yana shunday imkoniyat berilganidan nihoyatda mamnunmiz. Arablar juda mehmondo'st xalq, mana ko'rasizlar, Qatardagi musobaqa ham yuqori saviyada bo'ladi. 2002 yildan buyon jahon chempionati qaerda o'tkazilgan bo'lmasin - Germaniya, JAR, Braziliya va mana endi Rossiya - hammasi o'ziga xos darajada kechgan. O'ylaymanki, Qatar ham bundan mustasno bo'lmaydi", - deya aytib o'tdi OFK rahbari.

Spasibo and Do Svidaniya Russia, Marhaba Qatar!