Сречко Катанец билан суҳбат давомида жуда кўплаб мавзулар – футболдаги тактика, мураббийнинг ҳиссиётлари, спортдаги феноменлар ва ўз фаолиятидаги қизиқарли воқеалар хусусида 2 соатча гаплашдик. Катанец ОАВ вакиллари кўз ўнгида жиддий ва камгап инсондек туюлади, аммо суҳбатимиз жуда қизиқарли ва очиқ бўлди.

Энди бироз ортга ва асосий мавзуга қайтсак. Ўзбекистон терма жамоаси Жаҳон чемпионатига йўл олди. МТЖ мундиал йўлланмасини 5 июнь куни БААга қарши учрашувдан сўнг расман қўлга киритди, аммо бу йўл аслида анча олдин бошланган эди. Сречко Катанец терма жамоани 2021 йил август ойида қабул қилиб олди ва 2025 йил январь ойига қадар бошқариб келди. Унинг соғлиғи ўз ишини давом эттиришга йўл қўймади. Катанецнинг ўрнини Тимур Кападзе эгаллади ва ушбу икки мураббийнинг саъй-ҳаракатлари туфайли тарихий натижа қайд этилди.

Барчаси қандай бошланган эди?

Абу-Дабидаги ўйинга қайтсак. Австралиялик ҳакамнинг финал ҳуштаги янграганидан сўнг медиа трибунада ҳақиқий байрам бошланиб кетди. Журналистлар хурсандчилиги ва ҳаттоки қувонч кўз ёшлари. Ўйиндан кейинги матбуот анжуманида ҳам нималар рўй берганини биласиз. Стадионни тарк этаётган чоғимда, Катанецни табриклаш ва ундан бугунги ўйин ҳақида фикрини сўрашим кераклиги эсимга тушиб қолди. Мессенжер орқали уни табрикладим ва у ўз фикрлари билан бўлишди. Шундан сўнг, биз ғалабани нишонлашда давом этдик ва Катанецни унутиб юбордим. Икки кундан сўнг эса Тошкентга қайтган ва терма жамоанинг "Жар"да ўтказилган машғулотида ЎФА Сречко Катанецни Қатарга қарши ўйин учун таклиф этганидан хабар топдим. Шундан сўнг уни дарҳол интервьюга таклиф қилдим, аммо у жавоб бермади. Сўровимга жавоб олмаганидан сўнг барчаси эсимдан чиқиб кетди. Икки кундан сўнг эса Telegram'дан шахсий хабар келди. Иловани очиб қарасам, Катанец хабар ёзган:

"Салом. Мен Тошкентдаман. Агар хоҳласанг, бирор жойда кўришиб, қаҳва ичишимиз мумкин ва гаплашиб оламиз"

Шундай қилиб қулай вақт ва локацияни келишдик. Ниҳоят, кўришдик.

- Салом. Қалайсан?

- Салом, жаноб Катанец. Сизни яна кўриб турганимдан жуда хурсандман. Жаҳон чемпионатига чиққанимиз билан табриклайман. Ўзбекистон энди мундиалда иштирок этади.

- Ҳа, мундиалга чиқдик. Энди ўзингни қандай ҳис этяпсан?

- Шунчаки даҳшат. Ҳали ҳамон эйфориядаман. Аслида нималар содир бўлганини ҳалиям тўлиқ англаб ета олмаяпман, назаримда.

- Нега? (кулади)

- Биз биринчи маротаба Жаҳон чемпионатига чиқдик. Барча хурсанд. Ҳиссиётлар ва барчаси ажойиб. Бир неча йиллик орзу ниҳоят амалга ошди.

Мундиал йўлланмаси қўлга киритилгани ҳақида:

- Хурсандчилик яхши, аммо бунга кўникиш керак. Биз бу натижа сари яқинлашиб келаётган эдик ва бу амалга ошди. Мен Словения билан Жаҳон чемпионатига чиққанимда ҳам мамлакатда шундай хурсандчилик бўлган эди. Ҳозир фақатгина жараёндан роҳатланиш ва ушбу онларни яшаб ўтиш керак.

Кейин эса Катанец "Мен бугун журналист бўламан", дея кулди ва менга савол бера бошлади.

- Нима деб ўйлайсан, саралашнинг сўнгги босқичи қандай ўтди? Рақиблар ҳақидаги фикринг қизиқ...

- Очиғи, гуруҳимиз анча яхши эди, назаримда. Биз кучли бўлган Япония ёки Корея билан ўйнамадик. Тўғри, Эрон ҳам кучли, бироқ биз уларга қарши сўнгги вақтларда яхши натижа қайд этяпмиз. Қатар билан тез-тез ўйнаб турибмиз. Рақиблар масаласида омадимиз келди деб ҳисоблайман.

- Ҳа, фикринг тўғри. Биз Япония ёки Австралия каби мамлакатлар узоқ сафар қилмадик. Фақатгина бир маротаба Лаосга бордик холос. Умуман олганда, ҳаммаси яхши ўтди.

Давоми эртага соат 12:00да...

Сречко Катанец билан самимий суҳбат. Илк ҳиссиётлар ва саралаш босқичи ҳақида