Mahoratli posboni ushbu oyda o'tkazilgan uchta rasmiy uchrashuvda o'z darvozasi dahlsizligini saqlab qolishni uddasidan chiqdi. Biz bu borada olmaliqliklar darvozabonining fikrlari bilan qiziqdik.

"Alhamdulillah! Iyun oyining eng yaxshi darvozaboni deb topilganim uchun avvalo Xudoga shukur! Bunda nafaqat meni, balki butun jamoamni katta mehnati samarasi yotibdi. Murabbiyning menga bergan ishonchi va himoya chizig'idagi barcha futbolchilarning ko'magi asosida darvoza dahlsizligini saqlashga erishdim. Mashg'ulotlarda doim katta kuch bilan shug'ullanaman. O'yinda esa goh o'xshaydi, gohida yo'q. Hammasi Xudodan. Bu gal jamoamga yordamim tekkanidan xursandman.

Shu o'rinda "Championat.asia" sayti ijodkorlariga, menga ovoz berganlarga rahmat. Ishtirok va mehnatimizni shunday baholashganidan xursand bo'ldim. Hali ko'p ishlashga va jamoaga yanada yordamim tegishi uchun astoydil harakat qilaman. Niyatim, O'zbekiston terma jamoasi JCHga chiqib, millionlab muxlislarimizni xursand qilsin. Biz futbolchilar esa doimo milliy terma jamoamiz uchun yordamga shaymiz.

Shuningdek, o'zbek futboli muxlislaridan doimo futbolchilarimizni qo'llab-quvvatlab, ularga dalda bo'lishlari va ishonishlarini xohlayman. O'zbek futboli ishqibozlari hozirgidek doim futbolchilarga mehrli bo'lishlari bizga katta kuch-quvvat beradi. Hech bir futbolchi maydonga yutqazaman deb chiqmaydi. Shunchaki bazida o'yin o'xshaydi yoki yo'q. Xudo xohlasa joriy mavsum AGMK barcha olmaliqlik futbol muxlislarini xursand qilib, ular kutgan g'alabali onlarni taqdim etishga urinadi. Maqsadimiz jiddiy. Bu yo'lda esa hali ko'p ishlashimiz lozim",- deydi Suhrob Sultonov.

Suhrob Sultonov: "Jamoamga yordamim tekkanidan xursandman"