Сайтимиз ўз анънасига содиқ қолган ҳолда тур лауреатларини аниқлади.

АГМК билан ўйинда "Навбаҳор" посбони Ўткир Юсупов жамоасини бир неча бор муқаррар голлардан қутқариб қолди. Ўтган икки турни касаллиги туфайли ўтказиб юборган Юсупов тузалганига кўп бўлмасдан туриб майдонга тушди ва ишончли ҳаракат қила олди. Тўғри ўтказиб юборилган голда Ўткирнинг хатоси кузатилди, бироқ бу унинг ўйин давомидаги қолган ҳаракатларига раҳна сола олмади. Шундай қилиб Ўткир Юсупов championat.asia талқинига кўра 12-турнинг энг яхши дарвозабони деб топилди.

"Навбаҳор" клубида АГМКга қарши ўйиндан олдин бир қатор асосий таркиб футболчилари касаллик туфайли майдонга туша олишмади. Шунга қарамай "лочинлар" пешқадамлар сафида бораётган жамоага қарши муносиб ҳаракат қилишди ва 1:1 ҳисобида дуранг ўйнашди. Шу куни Азизбек Турғунбоевнинг биринчи таймда урган голи жуда чиройли чиқди. Championat.asia талқинига кўра турнинг энг чиройли голи муаллифи - Азизбек Турғунбоев.

Шота Арвеладзе бошчилигидаги "Пахтакор" мавсум давомида жуда ҳам кўп ғалабаларга эришади. Шунга қарамай Арвеладзе доим ҳам тур мураббийи бўлавермайди. Бироқ бу турда "шерлар" Тошкент дербисида "Локомотив"ни шунчаки "сочиб" ташлашди. Агар зарур бўлганида "Пахтакор" яна голлар уришга қодир эди. Шу боис Championat.asia талқинига кўра Шота Арвеладзе 12-турнинг энг яхши мураббийи деб топилди.

"Пахтакор" ярим ҳимоячиси Жалолиддин Машарипов "Локомотив" билан учрашувда маза қилиб футбол ўйнади десак хато бўлмайди. Уч марта шерикларига голли узатмани амалга оширган Жалолиддин иккинчи таймда чиройли гол уришга ҳам эришди. Осиё чемпионлар лигасидан олдин Машариповнинг мана шундай ажойиб формага кириб бораётгани одамни қувонтиради. Championat.asia талқинига кўра Жалолиддин Машарипов 12-турнинг энг яхши футболчиси деб топилди.

Суперлига. 12-тур лауреатлари