Saytimiz o'z annasiga sodiq qolgan holda tur laureatlarini aniqladi.

AGMK bilan o'yinda "Navbahor" posboni O'tkir Yusupov jamoasini bir necha bor muqarrar gollardan qutqarib qoldi. O'tgan ikki turni kasalligi tufayli o'tkazib yuborgan Yusupov tuzalganiga ko'p bo'lmasdan turib maydonga tushdi va ishonchli harakat qila oldi. To'g'ri o'tkazib yuborilgan golda O'tkirning xatosi kuzatildi, biroq bu uning o'yin davomidagi qolgan harakatlariga rahna sola olmadi. Shunday qilib O'tkir Yusupov championat.asia talqiniga ko'ra 12-turning eng yaxshi darvozaboni deb topildi.

"Navbahor" klubida AGMKga qarshi o'yindan oldin bir qator asosiy tarkib futbolchilari kasallik tufayli maydonga tusha olishmadi. Shunga qaramay "lochinlar" peshqadamlar safida borayotgan jamoaga qarshi munosib harakat qilishdi va 1:1 hisobida durang o'ynashdi. Shu kuni Azizbek Turg'unboevning birinchi taymda urgan goli juda chiroyli chiqdi. Championat.asia talqiniga ko'ra turning eng chiroyli goli muallifi - Azizbek Turg'unboev.

Shota Arveladze boshchiligidagi "Paxtakor" mavsum davomida juda ham ko'p g'alabalarga erishadi. Shunga qaramay Arveladze doim ham tur murabbiyi bo'lavermaydi. Biroq bu turda "sherlar" Toshkent derbisida "Lokomotiv"ni shunchaki "sochib" tashlashdi. Agar zarur bo'lganida "Paxtakor" yana gollar urishga qodir edi. Shu bois Championat.asia talqiniga ko'ra Shota Arveladze 12-turning eng yaxshi murabbiyi deb topildi.

"Paxtakor" yarim himoyachisi Jaloliddin Masharipov "Lokomotiv" bilan uchrashuvda maza qilib futbol o'ynadi desak xato bo'lmaydi. Uch marta sheriklariga golli uzatmani amalga oshirgan Jaloliddin ikkinchi taymda chiroyli gol urishga ham erishdi. Osiyo chempionlar ligasidan oldin Masharipovning mana shunday ajoyib formaga kirib borayotgani odamni quvontiradi. Championat.asia talqiniga ko'ra Jaloliddin Masharipov 12-turning eng yaxshi futbolchisi deb topildi.

Superliga. 12-tur laureatlari